Topi i Artë 2026 arriti diçka që vitet e fundit ishte bërë gjithnjë e më e vështirë: emri i fituesit mbeti sekret deri në momentin e fundit.
Delegacionet e klubeve dhe futbollistëve të nominuar, sapo mbërritën në Londër, kërkuan informacion për fituesin, por këtë herë nuk pati asnjë rrjedhje. Organizatorët ruajtën heshtje totale, ndryshe nga edicionet e mëparshme ku emri i fituesit ishte zbuluar përpara ceremonisë.
Edicioni i këtij viti ishte një nga më të hapurit e dekadës së fundit, me Harry Kane, Kylian Mbappé dhe Lamine Yamal si kandidatët kryesorë për podiumin, ndërsa në garë ishin edhe emra si Rodri, Ousmane Dembélé, Michael Olise, Luis Díaz dhe të tjerë.
Votimi kishte përfunduar rreth një muaj përpara galasë, ndërsa materialet për fituesit ishin përgatitur prej kohësh. Megjithatë, rezultati mbeti i fshehtë deri në fund.
Edhe vonesa prej rreth 70 minutash në nisjen e ceremonisë vetëm sa shtoi më shumë zërat dhe hamendësimet për atë që do të ndodhte në skenën e “London Palladium”.
Barcelona dhe Real Madrid ndanë të njëjtin hotel gjatë qëndrimit të tyre të shkurtër në Londër, ndërsa delegacioni katalanas ishte më i madh pas sukseseve në kategorinë e femrave dhe fitimit të Trofeut Kopa nga Lamine Yamal.
Me kalimin e viteve, Topi i Artë është shndërruar nga një ceremoni modeste në një ngjarje globale. Tapeti i kuq, prania e yjeve aktualë dhe legjendave të futbollit, si dhe interesi i jashtëzakonshëm mediatik e kanë kthyer ceremoninë në një nga eventet më të rëndësishme sportive të vitit.
Dhe këtë herë, një nga sukseset më të mëdha të organizatorëve ishte pikërisht fakti që askush nuk e dinte me siguri se kush do ta fitonte Topin e Artë deri në momentin kur emri i Harry Kane u shpall në skenë.
