Përfaqësuesi i OSBE-së për Lirinë e Medias, ambasadori Jan Braathu, ka shprehur shqetësimin për raportimet mbi dhunën ndaj gazetarëve dhe punonjësve të medias gjatë protestave në Shqipëri, si dhe për pengesat që ata kanë hasur gjatë ushtrimit të detyrës.
Braathu thekson se gazetarët duhet të jenë në gjendje të informojnë publikun pa u përballur me sulme apo ndërhyrje të pajustifikuara. Sipas tij, mbrojtja e tyre është një kusht thelbësor për garantimin e lirisë së medias dhe funksionimin e demokracisë.
Në reagimin e tij, përfaqësuesi i OSBE-së u kërkon autoriteteve shqiptare të hetojnë pa vonesë dhe në mënyrë efektive të gjitha incidentet e raportuara. Vëmendje e veçantë, sipas tij, duhet t’u kushtohet edhe pretendimeve për përdorim të tepruar ose joproporcional të forcës nga efektivët e policisë.
Braathu nënvizon gjithashtu nevojën për të parandaluar përsëritjen e rasteve të tilla, duke kërkuar zbatimin e udhëzimeve të Policisë së Shtetit për sigurinë e gazetarëve. Ai thekson se gjatë tubimeve publike, uniformat blu duhet të garantojnë kushte që u lejojnë gazetarëve të raportojnë në mënyrë të sigurt dhe pa pengesa.
Në mbështetje të qëndrimit të tij, Braathu iu referua edhe Vendimit nr. 3/18 të Këshillit Ministror të OSBE-së, i cili përcakton angazhimet e shteteve pjesëmarrëse për mbrojtjen e gazetarëve dhe përgjegjësinë për sulmet ndaj tyre.
Jan Braathu: Raportimet e vazhdueshme për dhunën ndaj gazetarëve dhe punonjësve të medias, si dhe për pengimin e tyre gjatë raportimit të protestave që po zhvillohen në Shqipëri, janë shqetësuese.
Liria e medias dhe e drejta e publikut për t’u informuar janë thelbësore për funksionimin e një shoqërie demokratike. Garantimi i sigurisë së gazetarëve është i domosdoshëm për respektimin e këtyre parimeve, edhe gjatë demonstratave publike, ku gazetarët duhet të jenë në gjendje të raportojnë lirisht, në mënyrë të sigurt dhe pa ndërhyrje të pajustifikuara. Këto parime pasqyrohen në Vendimin nr. 3/18 të Këshillit Ministror të OSBE-së për Sigurinë e Gazetarëve, i cili riafirmon angazhimet e shteteve pjesëmarrëse për mbrojtjen e gazetarëve dhe garantimin e përgjegjshmërisë për sulmet ndaj tyre.
U bëj thirrje autoriteteve shqiptare që të hetojnë menjëherë dhe në mënyrë efektive të gjitha incidentet e raportuara, përfshirë pretendimet për përdorim të tepruar ose joproporcional të forcës nga policia. Po aq e rëndësishme është parandalimi i incidenteve të tjera. Për këtë qëllim, inkurajoj autoritetet ligjzbatuese që të zbatojnë plotësisht udhëzimet ekzistuese të Policisë së Shtetit për Sigurinë e Gazetarëve, duke garantuar që punonjësit e policisë të mundësojnë raportimin e sigurt dhe pa pengesa gjatë tubimeve publike.
