Joan Laporta ka konfirmuar se marrëdhëniet institucionale mes Barcelonës dhe Real Madridit janë ndërprerë, duke folur hapur për një përplasje mes dy klubeve më të mëdha të futbollit spanjoll.
Presidenti i Barcelonës ishte kategorik në deklaratën e tij, duke bërë të qartë se raportet mes dy klubeve kanë ndryshuar plotësisht.
“Nuk ka më asnjë marrëdhënie me Real Madridin. Madje do të thosha se tashmë ka një përplasje mes nesh. Real Madridi ka humbur çdo besueshmëri. Mendoj se kanë bërë një gabim dhe tani po paguajnë pasojat”, deklaroi Laporta.
Sipas raportimit, një nga arsyet kryesore të prishjes së marrëdhënieve lidhet me përfshirjen e Real Madridit në proceset ligjore kundër Barcelonës, si dhe me përplasjet e vazhdueshme publike rreth arbitrimit në futbollin spanjoll.
Drejtuesit e Barcelonës i kanë konsideruar veprimet e klubit madrilen si një përpjekje për të destabilizuar rivalin, ndërsa tensionet kanë sjellë edhe anulimin e disa aktiviteteve zyrtare të përbashkëta mes drejtuesve të dy klubeve.
Deklaratat e Laportës vijnë në prag të një tjetër El Clásico, duke rritur edhe më shumë temperaturën mes Barcelonës dhe Real Madridit.
Rivaliteti mes dy klubeve tashmë nuk kufizohet vetëm në fushën e lojës, por është shndërruar edhe në një përplasje të fortë institucionale.
