Günther Fehlinger-Jahn, drejtues i Komitetit Austriak për Zgjerimin e NATO-s dhe kandidat i shpallur për president të Austrisë në vitin 2028, i ka drejtuar një propozim politik kryeministrit Edi Rama, duke i kërkuar të largohet nga posti dhe të vendoset përfundimisht në Vjenë.
Në deklaratën e tij publike, Fehlinger-Jahn i bën thirrje Austrisë të shqyrtojë mundësinë e negociimit të një marrëveshjeje me Ramën, e cila do të parashikonte tërheqjen e tij nga politika shqiptare. Sipas propozimit, kjo mund të kontribuonte në uljen e tensioneve dhe në hapjen e rrugës për një tranzicion paqësor të pushtetit.
Plani i paraqitur prej tij përfshin dorëheqjen e menjëhershme të kryeministrit, largimin e përhershëm nga Shqipëria dhe vendosjen në kryeqytetin austriak, në përputhje me ligjet e vendit pritës. Fehlinger-Jahn kërkon gjithashtu që Rama të heqë dorë përfundimisht nga angazhimi politik dhe të mos rikthehet më në garën për pushtet apo të ndikojë në politikën shqiptare.
Një nga pikat e përmendura në propozim lidhet edhe me mundësinë e diskutimit të mbrojtjes ligjore ndaj ndjekjes penale apo dënimit, gjithmonë brenda kufijve të legjislacionit përkatës. Ai nënvizon se një marrëveshje e tillë nuk mund të garantojë imunitet për vepra penale që nuk mund të amnistohen sipas ligjit.
Fehlinger-Jahn ka sqaruar se kjo është një nismë personale politike dhe se nuk ekziston një marrëveshje e përfunduar, apo ndonjë garanci e dhënë nga qeveria austriake.
Në mesazhin e tij, ai kërkon gjithashtu që çdo proces tranzicioni të shoqërohet me zgjedhje të besueshme dhe respektim të vullnetit të qytetarëve. Ndër masat e propozuara përfshihen monitorimi i pavarur ndërkombëtar, mundësitë e barabarta për partitë në media dhe transparenca gjatë numërimit të votave.
“Edi Rama duhet të japë dorëheqjen dhe të deklarojë publikisht se nuk do të kandidojë më. Në këmbim, një marrëveshje e negociuar duhet t’u japë fund protestave dhe dhunës në rrugë, duke garantuar njëkohësisht të drejtën për tubime paqësore”, shkruan ai.
Në përfundim, Fehlinger-Jahn i drejtohet drejtpërdrejt kreut të qeverisë shqiptare, duke e ftuar të pranojë atë që e quan “marrëveshja e Vjenës” dhe të largohet nga pushteti, me argumentin se kjo do t’i hapte rrugë një kapitulli të ri politik për Shqipërinë.
Sipas tij, një tranzicion demokratik paqësor do të ishte i rëndësishëm edhe për vijimin e rrugëtimit evropian të vendit.
