Fulham vazhdon të zhytet në krizë në Premier League, ndërsa Álvaro Arbeloa ende nuk ka arritur të sigurojë fitoren e parë në kampionat.
Skuadra e tij u mund 2-1 nga Ipswich Town, edhe pse kaloi e para në avantazh. Ryan Sessegnon zhbllokoi sfidën në minutën e 55-të, por gjithçka u përmbys në fund.
Ipswich barazoi në minutën e 89-të me Ouattara, ndërsa vetëm tre minuta më vonë Dara O’Shea realizoi golin e fitores për 2-1.
Pas gjashtë javësh, Fulham mbetet në vendin e fundit të Premier League me vetëm dy pikë nga 18 të mundshme. Skuadra ka regjistruar dy barazime dhe katër humbje, pa asnjë fitore.
Pavarësisht rezultateve, Arbeloa ka mbrojtur veten dhe projektin e tij, duke kujtuar eksperiencën që ka pasur në nivelet më të larta të futbollit.
“Ndoshta nuk e dini kush jam, por kam luajtur për skuadrën më të mirë në botë. Kam drejtuar skuadrën më të mirë në botë. Presioni ka qenë pjesë e jetës sime që kur isha fëmijë”, deklaroi ai.
Ish-trajneri i Real Madridit këmbënguli se nuk ka frikë nga situata dhe se presioni është pjesë normale e profesionit.
“Presioni është i rëndësishëm për mua dhe më pëlqen. Nuk kam frikë. Nuk mund të jesh trajner nëse ke frikë. Duhet të punosh, të marrësh vendime dhe t’u tregosh besim lojtarëve.”
Fulham do të kërkojë reagimin në ndeshjen e ardhshme të Premier League ndaj Hull Cityt më 17 tetor.
