Cristiano Ronaldo dëshiron të rikthehet te kombëtarja e Portugalisë pas përplasjes së fundit me trajnerin Jorge Jesus.
Këtë e ka konfirmuar vetë presidenti i Federatës Portugeze të Futbollit, Pedro Proença, i cili deklaroi se dëshira për të parë sërish Ronaldon me kombëtaren është e përbashkët.
“Është koha për qetësi dhe maturi. Ekziston një vullnet i shprehur nga të gjithë. Federata, presidenti i FPF-së, trajneri, kapiteni dhe lojtarët. Të gjithë, pa përjashtim, duan të jenë sërish bashkë në nëntor”, deklaroi Proença.
Ai theksoi veçanërisht dëshirën e kapitenit portugez për t’u rikthyer.
“Ka një dëshirë të madhe nga ana e kapitenit tonë për t’u kthyer në kombëtare, një vend ku, siç thotë edhe vetë, ndihet i lumtur.”
Ronaldo u largua papritur nga grumbullimi i Portugalisë më 30 shtator, pas mosmarrëveshjeve me Jorge Jesus. Sipas versionit të portugezit, konflikti nisi pasi trajneri i kërkoi të ngrohej për rreth 30 minuta ndaj Norvegjisë, por më pas nuk e aktivizoi.
Proença deklaroi se Ronaldo dhe Jorge Jesus kanë më shumë gjëra që i bashkojnë sesa i ndajnë, duke përmendur si objektiv të përbashkët mbrojtjen e titullit në Nations League.
“Duam ta mbrojmë këtë titull dhe ka një vullnet të përbashkët rreth këtij objektivi. Pasi t’i kapërcejmë këto dallime, të cilat unë i kam përshkruar si një keqkuptim, duhet të mësojmë nga ajo që ndodhi.”
Ndërkohë, Komisioni Disiplinor i Federatës ka hapur një çështje ndaj Ronaldos, i cili aktualisht është edhe i pezulluar në mënyrë të përkohshme.
Proença refuzoi të komentonte mbi procesin, duke theksuar se Komisioni Disiplinor është një organ autonom dhe se çështja do të shqyrtohet në mënyrë të pavarur.
