Harry Kane ka qenë protagonisti absolut i fitores 3-0 të Anglisë ndaj Çekisë në Wembley, në një mbrëmje historike për kapitenin e “Tre Luanëve”.
Sulmuesi barazoi rekordin e Peter Shilton me 125 paraqitje për kombëtaren angleze dhe e festoi këtë arritje në mënyrën më të mirë të mundshme, duke qenë i përfshirë në të tre golat e sfidës.
Anglia kaloi në avantazh në minutën e 27-të, kur Vladimir Coufal devijoi në portën e tij një krosim të Kane, duke i dhënë vendasve epërsinë 1-0.
Në minutën e 40-të, Kane mori skenën plotësisht. Pas një aksioni të bukur të Anglisë dhe asistimit të Morgan Rogers, sulmuesi realizoi golin e dytë me një përfundim të klasit të lartë.
Kapiteni anglez vulosi fitoren në minutën e 57-të, kur shënoi me kokë pas një goditjeje këndi, duke çuar në 91 numrin e golave të tij me kombëtaren.
Kane ishte pranë një tjetër realizimi, por një goditje e fuqishme nga jashtë zonës u ndal nga traversa.
Jude Bellingham zhvilloi një ndeshje më të qetë dhe u zëvendësua rreth 20 minuta para fundit, ndërsa Trent Alexander-Arnold ishte titullar dhe krijoi disa raste të rrezikshme nga krahu i djathtë. Anthony Gordon nuk u aktivizua.
Me këtë sukses, Anglia regjistron fitoren e tretë radhazi dhe ngjitet në nëntë pikë, duke iu afruar ndjeshëm kualifikimit në çerekfinalet e Nations League.
