Lionel Messi do të luajë ndeshjen e fundit me kombëtaren e Argjentinës ndaj Beninit, në “Monumental” të Buenos Airesit, në një mbrëmje që pritet të kthehet në një homazh të madh për kapitenin e Albicelestes.
Në prag të sfidës, lojtarët e Beninit kanë folur për emocionin e përballjes me Messin. Mbrojtësi Mohamed Tijani nuk i kurseu elozhet për 39-vjeçarin.
“Është më i miri në botë. Është zoti i futbollit”, deklaroi Tijani, ndërsa shtoi se skuadra e tij nuk ka përgatitur ndonjë plan të veçantë për ta ndalur.
“Nuk duhet ta markojmë Messin. Do ta shijojmë këtë ndeshje. Do ta shikoj dhe do t’i them: ‘Messi, je zoti’. Për mua është më i miri në botë”, u shpreh ai.
Një qëndrim tjetër mbajti portieri Marcel Dandjinou, i cili e bëri të qartë se respekti për Messin nuk do të thotë se Benini do t’i bëjë dhurata në fushë.
“Nëse Messi dëshiron të shënojë, duhet të bëjë gjithçka për ta arritur. Edhe nëse ka penallti në minutën e fundit, do të përpiqem ta pres. Jemi këtu për ta nderuar, por askush nuk na ka thënë t’i falim një gol”, deklaroi ai.
Messi ndërkohë ka zhvilluar edhe stërvitjen e fundit me Argjentinën, në një atmosferë të qetë dhe me shumë buzëqeshje. Ai u stërvit pranë shokëve të tij dhe kompletoi përgatitjet për atë që do të jetë paraqitja e tij e 208-të me kombëtaren.
Ylli argjentinas debutoi me Albicelesten në vitin 2005 dhe gjatë rrugëtimit të tij fitoi Botërorin 2022, Copa América 2021 dhe 2024, si edhe Finalissima 2022.
