Zgjedhjet parlamentare të 9 shkurtit në Kosovë marrin vlerësim pozitiv nga Misioni vëzhgues i Bashkimit Evropian.
Por, megjithëse pozitive e të qeta, për BE procesi pati dhe të meta.
‘Gjuha negative dhe nxitëse e partisë në pushtet ndaj medias dhe gjyqësorit, ndërhyrja e Serbisë përmes trysnisë ndaj votuesve serbë të Kosovës, si dhe kritikat e një zyrtari amerikan ndaj kryeministrit Albin Kurti gjatë fushatës, ishin disa prej shqetësimeve që u ngritën në konferencën për media të Misionit vëzhgues të BE, që u mbajt të martën në Prishtinë.
Për shefen e misionit vëzhgues të BE-së në Kosovë, Nathalie Loiseau, dita e zgjedhjeve ishte e qetë, votuesit kishin mundësi të votonin në kushte të mira, kurse fushata ishte mjaft konkurruese.
“Këto janë sinjale që qytetarët e Kosovës janë të përkushtuar ndaj demokracisë”, tha Loiseau.
Por vëzhguesit e misionit të BE, sipas zonjës Nathalie Loiseau, kanë konstatuar gjuhë negative të përdorur gjatë fushatës nga lëvizja ‘Vetëvendosje’ ndaj medias dhe gjyqësorit.
“Kjo u pasqyrua edhe në rrjetet sociale. Ne kemi vërejtur me brengosje gjuhën negative nga partia në pushtet kundër medias dhe gjyqësorit. Bojkotimi i mediumeve specifike dhe debateve ka kontribuuar në uljen e mundësisë për votuesit që të bëjnë zgjidhje më të mira”, u shpreh shefja e misionit vëzhgues të BE në Kosovë.
Shefja e misionit të BE-së theksoi se numri i partive politike serbe që morën pjesë në zgjedhjet e 9 shkurtit ishte pozitive, por shtoi se Serbia ka ndërhyrë në zgjedhje duke e mbështetur vetëm Listën Serbe – partinë më të madhe të serbëve në Kosovë.
“Shumë bashkëbisedues raportuan për presion nga anëtarët e Listës Serbe mbi votuesit dhe kishte ndërhyrje të vazhdueshme dhe të përsëritshme nga Serbia”, tha ajo.
Raporti përfundimtar i misionit të vëzhguesve të bllokut do ta publikojë pas rreth dy muajve, i cili do të përfshijë një analizë dhe rekomandime.
