Mbrojtja Civile e Arabisë Saudite lëshoi para agimit të së shtunës alarme emergjence për kryeqytetin Riad dhe qytetin e afërt Al-Kharj, duke paralajmëruar banorët për një kërcënim të mundshëm të sigurisë, raportoi Reuters.
Ky ishte alarmi i parë i njohur i Mbrojtjes Civile për Riadin që kur Huthët e Jemenit, të lidhur me Iranin, kanë intensifikuar sulmet ndërkufitare ndaj Arabisë Saudite.
Një gazetar i Reuters raportoi se dëgjoi dy shpërthime në lagjen Al Olaya të Riadit gjatë periudhës kur alarmi ishte aktiv. Autoritetet saudite nuk dhanë menjëherë shpjegime për shkakun e shpërthimeve.
Më vonë, Mbrojtja Civile Saudite dha “sinjalin e kalimit të rrezikut”, duke njoftuar se situata në Riad dhe Al-Kharj ishte kthyer në normalitet. Banorëve iu kërkua të vazhdonin të ndiqnin udhëzimet zyrtare.
Deri në atë moment, autoritetet nuk kishin dhënë informacion për dëme, viktima apo nëse ndonjë raketë ose dron ishte interceptuar.
Huthët kërcënojnë me hakmarrje
Alarmi erdhi disa orë pasi zëdhënësi ushtarak i Huthëve, Yahya Saree, deklaroi se grupi kishte penguar atë që e përshkroi si “përpjekje kriminale” në kryeqytetin jemenas, Sana’a.
Saree fajësoi Arabinë Saudite dhe premtoi hakmarrje. Megjithatë, Huthët nuk morën menjëherë përgjegjësinë për shpërthimet e raportuara në Riad.
Përshkallëzohen shqetësimet për sigurinë në rajon
Huthët, të cilët kontrollojnë zonat më të populluara të Jemenit dhe pjesën më të madhe të veriut të vendit, kanë rritur ndjeshëm sulmet ndaj Arabisë Saudite që nga shpallja e një bllokade detare ndaj mbretërisë në korrik.
Grupi ka goditur gjithashtu anije tregtare të lidhura me Arabinë Saudite në Detin e Kuq dhe ka zgjeruar operacionet ushtarake përgjatë bregut perëndimor të Jemenit.
Arabia Saudite i është përgjigjur me sulme ajrore më intensive ndaj pozicioneve të Huthëve në Jemen. Sipas Organizatës Ndërkombëtare për Migracionin (IOM), konflikti i rinovuar ka zhvendosur më shumë se 100 mijë persona.
Përshkallëzimi ka rritur gjithashtu shqetësimet për sigurinë në Detin e Kuq dhe në Ngushticën Bab al-Mandeb, një nga korridoret kryesore të transportit detar në botë.
Alarmi i fundit në Riad vjen në një periudhë të përshkallëzimit më të gjerë në Lindjen e Mesme, të lidhur me përplasjen SHBA–Iran. Sulmet e Huthëve po ndikojnë gjithnjë e më shumë në qytetet saudite, infrastrukturën energjetike dhe trafikun detar.
Rijadi akuzon grupin e mbështetur nga Irani se kërcënon stabilitetin rajonal, ndërsa Huthët thonë se operacionet e tyre janë përgjigje ndaj veprimeve ushtarake saudite në Jemen.
