Ruben Amorim nuk është fshehur pas humbjes 2-0 ndaj Benficas, duke pranuar hapur problemet e Milanit si në fazën sulmuese, ashtu edhe në mbrojtje.
“Kishim topin, por nuk po i krijonim probleme kundërshtarit. Na mungoi kreativiteti pranë zonës”, deklaroi trajneri kuqezi, i cili shpjegoi edhe zgjedhjet në formacion. Rabiot nuk e nisi nga minuta e parë pasi kishte luajtur 90 minuta vetëm pak ditë më parë, ndërsa Pulisic po rikuperohet nga dëmtimi dhe Moreira kishte humbur disa seanca stërvitore.
Amorim pranoi se Milanit i mungon ende një strukturë e qartë në sulm. “Të gjithë futemi nga brenda dhe qëndrojmë shumë pranë njëri-tjetrit, kur duhet të hapim lojën. Askush nuk sulmon thellësinë dhe në këtë mënyrë nuk krijojmë hapësira.”
Problemet nuk munguan as në mbrojtje. Trajneri ishte veçanërisht kritik për mënyrën se si erdhi goli i parë: “Nuk mund të pësojmë një gol të tillë kur duhet të mbrojmë zonën. Tashmë kemi vështirësi për të krijuar raste dhe nëse pësojmë kaq lehtë, gjithçka bëhet më e komplikuar.”
Amorim pranoi gjithashtu se skuadra po hyn keq në ndeshje. “Për të dytën ndeshje radhazi e kemi nisur keq. Duhet të kuptojmë pse dhe do të gjejmë mënyrën e duhur për t’u përshtatur.”
