Thomas Meunier ka kritikuar ashpër çmimet e çmendura në merkato pas transferimit të Ayyoub Bouaddit te Manchester City për 100 milionë euro.
Belgu, i cili ka luajtur me mesfushorin maroken te Lille, e vlerësoi shumë talentin e 18-vjeçarit, por insistoi se shifrat e sotme nuk tregojnë më domosdoshmërisht nivelin real të një futbollisti.
“Ayyoub është një lojtar i jashtëzakonshëm, por nuk ka më kuptim të flasim për para, sepse merkatoja nuk ka më logjikë. Mund të blesh një gomar për 200 milionë paund dhe një lojtar shumë të mirë për 20 milionë. Nuk ka më asnjë kuptim”, deklaroi Meunier.
Bouaddi u transferua te Manchester City pasi kishte zhvilluar 96 ndeshje me Lille dhe kishte spikatur edhe me Marokun në Botërorin 2026. Për të interesoheshin gjithashtu Arsenal, Manchester United dhe Bayern Munich, por City fitoi garën duke paguar 100 milionë euro, shifër rekord për një shitje të Lille.
