Dy shtetas shqiptarë kanë rënë në prangat e policisë italiane pas një operacioni antidrogë në zonën e Chietit, ku në një kompresor të transportuar me furgon u gjetën 41 kilogramë hashash dhe marijuanë.
Sipas mediave italiane, policia ndaloi për kontroll një furgon që lëvizte në autostradën A14, në aksin Chieti-Pescara. Gjatë kontrollit të mjetit, efektivët konstatuan praninë e një kompresori të madh, i cili ishte importuar nga jashtë.
Dyshimet e policisë u përqendruan te pajisja dhe pas një kontrolli të detajuar, brenda saj u gjetën të fshehura rreth 41 kilogramë hashash dhe marijuanë.
Lënda narkotike u sekuestrua, ndërsa shoferi i furgonit, një 39-vjeçar shqiptar, u arrestua me akuzën e trafikut të lëndëve narkotike dhe u dërgua në burgun “Madonna del Freddo”.
Në furgon ndodhej edhe një tjetër shtetas shqiptar, 38 vjeç. Megjithatë, pas verifikimeve dhe hetimeve të para, ai është lënë i lirë me urdhër të prokurorit, pasi pozicioni i tij në këtë fazë të hetimit është konsideruar i ndryshëm nga ai i drejtuesit të mjetit.
Hetimet vijojnë për të zbardhur origjinën dhe destinacionin e lëndës narkotike, si dhe për të identifikuar persona të tjerë që mund të jenë të përfshirë në trafikun e saj.
