Tre shtetas rumunë, babai, nëna dhe vëllai i një të dënuareje rumune, janë ndaluar pasi dyshohet se tentuan të fusnin sende të ndaluara në IEVP Pojskë.
Ngjarja ka ndodhur ditën e djeshme, rreth orës 14:00, kur tre familjarët ishin paraqitur në institucion për të takuar vajzën e tyre, e cila vuan dënimin në Pojskë për veprën penale të mashtrimit.
Familjarët, të cilët kishin mbërritur në Shqipëri rreth dy ditë më parë, kishin me vete disa çanta me rroba dhe sende për të dënuarën. Gjatë kontrollit të kryer nga efektivët e IEVP Pojskë, në njërën prej çantave u gjetën një thikë dhe një aparat celular.
Dyshohet se sendet do t’i dorëzoheshin të dënuarës gjatë takimit. Pas konstatimit, tre shtetasit rumunë u ndaluan dhe u shoqëruan për kryerjen e procedurave të mëtejshme.
Ata u morën në pyetje në prani të avokatit, ndërsa janë sekuestruar edhe pamjet filmike të kontrolleve dhe momentit kur u konstatuan sendet e ndaluara.
Për momentin mbetet e paqartë arsyeja se përse familjarët kishin tentuar të fusnin në burg edhe thikën, krahas celularit. Sipas burimeve, e dënuara rumune nuk njihet si person problematik dhe nuk rezulton të ketë pasur konflikte me të dënuarat e tjera në institucion.
Pas ngjarjes është ushtruar kontroll edhe në dhomën ku qëndron e dënuara, por nuk është konstatuar asnjë send tjetër i ndaluar.
Hetimet vijojnë për të zbardhur rrethanat dhe qëllimin e futjes së sendeve të ndaluara në institucionin e vuajtjes së dënimit.
