Ismail Picari është tashmë në arrest. Shqiptari u arratis pasi hodhi makinën me shpejtësi në det bashkë me gruan e tij brenda. Dy persona që panë skenën ndërhynë dhe arritën ta parandalonin mbytjen e saj.
Incidenti dramatik ndodhi në portin e kanalit të Cattolicës në afërsi të Riminit në Itali. Ishte pasditja e 19 gushtit kur një Volkswagen Golf i bardhë i drejtuar nga 46-vjeçari shqiptar, përfundoi në kanal. Gruaja e tij, një 40-vjeçare, ishte gjithashtu brenda në makinë, por zona e portit ishte e mbushur me kalimtarë, banorë, turistë dhe peshkatarë.
Dy prej tyre kishin panë gjithçka. Makinën që rriti shpejtësinë dhe më pas të përplasej me derën e bagazhit që u hap papritur. Të dy u hodhën në ujë për t’i shpëtuar. Picari doli i pari dhe menjëherë u largua nga vendi i ngjarjes. Gruaja e tij, e tronditur, e hutuar dhe e lënduar, u dërgua menjëherë në spital.
Të dy sapo kishin pasur një grindje dhe 46-vjeçari sapo ishte liruar nga arresti. Vetëm dy ditë më parë, ai ishte arrestuar nga Karabinierët për rezistencë ndaj një oficeri publik. Ai kishte sulmuar gruan e tij dhe disa anëtarë të familjes kishin telefonuar policinë. Njëri prej tyre e dëgjoi duke thënë fjalë kërcënuese ndaj gruas teksa po e merrnin me pranga.
“Do të të vras, do të të qëlloj! Më arresto sot, por kur të dal, do të vij të të kërkoj.” Tani 46-vjeçari është përsëri në pranga. Ai ishte liruar pas arrestimit më 17 gusht dhe 2 ditë më pas tentoi vrasjen e gruas. Picari akuzohet tashmë për tentativë vrasjeje.
“Ndjeva burrin tim të vinte duart mbi mua” – rrëfeu gruaja më pas. “Mbeta vetëm në makinë dhe ai po largohej”.
Shumë në fshat raportuan se ai e kishte keqtrajtuar vazhdimisht gruan e tij dhe se në përgjithësi ishte një person i dhunshëm.
Dosja e tij e gjerë kriminale e konfirmon këtë. Ai është raportuar, arrestuar, dënuar dhe akuzuar vazhdimisht për një sërë krimesh: rezistencë ndaj një zyrtari publik, dehje dhe mbajtje arme të aftë për të shkaktuar dëm. Çifti ka dy fëmijë të vegjël, një djalë dhe një vajzë.
Sipas dëshmisë së vajzës, në javët e fundit ai e kishte rrahur gruan e tij disa herë. Para se të shkonin në port, ai dyshohet se kërkoi që gruaja e tij ta çonte në bankë për të ndarë llogaritë e tyre. Pastaj pasoi grindja, duke kulmuar me rezultatin dramatik të makinës që përfundoi në ujë.
Vajza tha gjithashtu se babai i saj kishte qenë viktimë e një aksidenti në vitin 2018 dhe se që nga ai moment, ai kishte filluar të shfaqte sjellje gjithnjë e më agresive. Pasi mblodhën dëshmi, karabinierët shkuan menjëherë në shtëpinë e çiftit. Ata e gjetën atë në rrëmujë, sikur të kishte ndodhur një grindje e dhunshme së fundmi në shtëpi. Atë mbrëmje, Ismail Picari u ndalua aty pranë dhe u arrestua menjëherë.
