Një zjarr i përmasave të konsiderueshme ka përfshirë pasditen e sotme zonën e Paulesh–Vidhasasgjel, në Njësinë Administrative Pajovë, Bashkia Peqin.
Vatra është shfaqur rreth orës mesditës dhe ka përfshirë një sipërfaqe prej rreth 3 hektarësh me ullishte, pyje, ferra dhe bimësi të egër. Pas afro tre orësh ndërhyrje, flakët janë vënë nën kontroll .
Sipas shërbimit zjarrfikës, zjarri ka djegur mbi 2 hektarë sipërfaqe, kryesisht ullishte dhe barishte.
Në operacionin për shuarjen dhe izolimin e flakëve u angazhuan 22 forca zjarrfikëse, ndërsa në terren morën pjesë edhe 4 punonjës policie dhe banorë të zonës.
Për përballimin e situatës u kërkua mbështetje nga strukturat zjarrfikëse të Elbasanit, Cërrikut, Belshit dhe Rrogozhinës, të cilat ndihmuan në neutralizimin e vatrave dhe parandalimin e përhapjes së zjarrit.
Nga të dhënat paraprake dyshohet se zjarri ka qenë i qëllimshëm. Deri në përfundim të ndërhyrjes nuk raportohet për persona të ndaluar apo të lënduar.
