Zbardhen detaje të reja nga të shtënat me armë zjarri, të regjistruara mbrëmjen e kaluar në zonën e Milotit, ku një automjet u qëllua disa herë gjatë lëvizjes.
Sipas burimeve nga grupi hetimor, ngjarja ka ndodhur në vendin e njohur si ish-Posta e Policisë në Milot.
Dyshohet se një automjet tip “Audi A6”, ka ndjekur nga pas një automjet tip “Audi A7”, në të cilin udhëtonte “shënjestra”.
Burimet bëjnë me dije se, ndërsa automjetet ishin në lëvizje, autori i dyshuar ka qëlluar disa herë me armë zjarri në drejtim të “Audi A7”.
Pavarësisht të shtënave, fatmirësisht nuk ka pasur persona të plagosur. Nga hetimet paraprake, dyshohet se motivi i sulmit lidhet me një konflikt familjar, pasi personi, i cili ishte “shënjestër” ishte divorcuar nga motra e autorit të dyshuar.
Policia po vijon punën për kapjen e autorit, ndërsa hetimet janë në vijim për zbardhjen e plotë të rrethanave të ngjarjes.
