Dy të rinj, të moshës 22 dhe 27 vjeç terrorizuan mbrëmjen e së shtunës banorët e fshatit Gruemirë në Malësi të Madhe pasi qëlluan me rreth 100 plumba.
Lidhur me këtë ngjarje, të tjera detaje janë zbardhur së fundmi si dhe është mësuar identiteti i dy të rinjve dhe banorëve të fshatit me të cilët këta shtetas debatuan.
Burime për mediat bëjnë me dije se Erion Vocrri dhe Rivaldoi Zmijanej (Planaj), janë dy të rinjtë të cilët një natë më parë “ngritën në këmbë” banorët e fshatit si dhe Policinë e Shtetit.
Ata kishin shkuar në fshat për të vjedhur, mirëpo u pikasën nga tre banorët, Mirsad, Edison dhe Besim Kurtaj, me të cilët debatuan.
Gjatë ndjekjes nga tre personat e familjes Kurtaj, e cila zgjati 10 minuta, ata qëlluan me kallashnikov me rreth 100 plumba. Fatmirësisht si pasojë e këtyre të shtënave nuk pati e persona të lënduar.
Menjëherë pas kësaj ngjarje ata u larguan në drejtim të paditur, teksa Policia prej orësh tanimë po punon për kapjen e tyre.
Siç dhe raportuam më herët, bazuar në informacionet e dhëna nga Policia, dy të rinjtë kishin shkuar në fshatin Gruemirë për të vjedhur, por pasi u diktuan nga banorët, ngjarja mori tjetër rrjedhë.
“Specialistët për Hetimin e Krimeve të Komisariatit të Policisë Malësi e Madhe, në vijim të ngjarjes së ndodhur në fshatin Gruemirë, bazuar edhe në informacionet e siguruara nga inteligjenca policore dhe si rezultat i veprimeve të shpejta u bë e mundur zbardhja e ngjarjes, identifikimi dhe shpallja në kërkim e tyre.
U shpallën në kërkim shtetasit E. V., 22 vjeç, banues në fshatin Hot i Ri dhe R. Z(P)., 27 vjeç, banues në fshatin Shtoj i Vjetër;
Nga veprimet paraprake rezulton se dy shtetasit e mësipërm dyshohet se kishin shkuar për të vjedhur në fshatin Gruemirë por janë diktuar nga tre shtetas banorë të fshatit e të cilët këta dy shtetas kanë debatuar dhe më pas gjatë largimit kanë qëlluar me armë zjarri në ajër”, njoftoi Policia më herët.
