José Mourinho ka folur në prag të El Clásicos ndaj Barcelonës, në një konferencë për shtyp ku nuk ka zbuluar shumë nga planet e tij, por nuk kanë munguar batutat dhe përgjigjet karakteristike të portugezit.
Sipas “AS”, trajneri i Real Madridit u pyet edhe për deklaratat e Fermín López, i cili kishte thënë se ankesat e vazhdueshme të madrilenëve për arbitrimin “kanë filluar të bëhen të lodhshme”.
“Çfarë mund të them? Edhe ne lodhemi nga gjëra të tjera, por ato vazhdojnë të ndodhin…”, ishte përgjigjja e shkurtër e Mourinhos.
Portugezi foli edhe për rëndësinë e El Clásicos, duke theksuar se forma e javëve të fundit humbet shumë nga rëndësia kur përballen Barcelona dhe Real Madridi.
“Kur je në një seri të mirë, luan mirë dhe shënon gola, por në El Clásico ajo që ke bërë më parë nuk ka rëndësi. Është vërtet një ndeshje ndryshe.”
I pyetur nëse kjo sfidë do të jetë testi përfundimtar për të kuptuar nëse Real Madridi mund të fitojë trofe këtë sezon, Mourinho ishte i prerë:
“Real Madridi me Mourinhon fiton tituj.”
Trajneri komentoi gjithashtu çështjen e arbitrit të ndeshjes, duke thënë se emri i gjyqtarit nuk e shqetëson, por se problem për të është kur rregullat nuk respektohen.
Mourinho foli edhe për Barcelonën, duke pranuar se rivalët meritojnë vlerësime për gjërat e mira që bëjnë, por theksoi se Real Madridi është ende në fillimet e projektit të tij.
“Ne kemi vetëm tre muaj që punojmë së bashku. Jemi larg të qenit një produkt i përfunduar. Trajneri po njeh skuadrën dhe lojtarët po njohin trajnerin.”
Për Lamine Yamal, Mourinho bëri të qartë se Real Madridi e respekton cilësinë e tij, por nuk do të ndryshojë identitetin e skuadrës vetëm për ta ndalur.
“Ai është një lojtar i madh dhe lojtarët e mëdhenj respektohen. Por respekti është një gjë, ndërsa të ndryshosh planet, strukturën dhe të harrosh thelbin tënd është diçka tjetër. Ne nuk do ta bëjmë këtë.”
Në fund, kur u pyet sërish për mënyrën se si do ta sulmojë Barcelonën dhe për dobësitë e saj në mbrojtje, Mourinho e mbylli me një batutë:
“Ti je i zgjuar, por unë nuk jam budalla!”
