Në një intervistë, shefi i stacionit policor të Roskovecit, Mariglen Koroveshaj, ka rrëfyer momentet e negociatave me autorin e ngjarjes së rëndë të ndodhur në Vidhish të Roskovecit, Refit Buzi, për lirimin e ish-të fejuarës Rozalinda Plaka.
Koroveshaj tregon se ishte vetë zgjedhja e autorit që pranë automjetit të afrohej pikërisht shefi i stacionit policor, duke iu përgjigjur kërkesave të tij që të mos ishte i armatosur dhe të shkonte i vetëm.
Ai rrëfen se distanca më e afërt që i është afruar automjetit ka qenë rreth 2 metra dhe se e gjithë situata është monitoruar nga forcat RENEA. Sipas tij, çdo sekondë ishte vendimtare për shpëtimin e jetës së vajzës dhe autorit.
Koroveshaj tregon se vajza ishte jo vetëm e traumatizuar psikologjikisht, por kishte edhe dëmtime fizike, çka e kishte bërë të pamundur që ajo të ecte. Për këtë arsye, ai ka ndërhyrë duke e marrë në krahë dhe duke e larguar nga zona e rrezikut.
Për shefin e stacionit policor, kjo ka qenë situata më e vështirë e karrierës së tij 12-vjeçare në polici.
Koroveshaj: Me marrjen e njoftimit nga Salla Operative e Policisë për ngjarjen e ndodhur, kemi bërë njoftimin e eprorëve tanë. Jemi nisur menjëherë në vendin e ngjarjes. Kur shkuam aty mësuam se kishte viktima, autori ishte larguar, kishte marrë dhe vajzën e shtëpisë me vete. Jemi vënë në ndjekje së bashku me një patrullë policie. Mësuam numrin e kontaktit të autorit dhe e telefonuam për të bërë negociata. Kemi qenë në komunikime të vazhdueshme për disa orë me autorin, deri në momentin që autori është bindur dhe ka kërkuar që unë personalisht të afrohem në vendin ku ai ndodhej së bashku me pengun. Ka qenë zgjedhja e tij nga negociatat që janë bërë për rreth dy orë, nga momenti që autori është kontaktuar.
Koroveshaj rrëfen momentet kur iu afrua autorit të ngjarjes së rëndë, duke ndjekur kërkesat e tij për të shmangur përshkallëzimin e situatës. Ai tregon se çdo veprim ishte i menduar me kujdes, me qëllim shpëtimin e jetës së pengut dhe të autorit.
Koroveshaj: Unë jam afruar sipas kërkesave të autorit, në vendin ku ai ndodhej dhe përsëri ka refuzuar ta lëshonte vajzën, sepse e shikonte si garanci që të mos i ndodhte gjë. Në ato momente më ka kërkuar që të afrohem i paarmatosur dhe i vetëm. E kam zbatuar kërkesën e autorit. Në momentin që i jam afruar, ka kërkuar sërish të më shikonte nëse jam i armatosur. E kam zbatuar kërkesën e tij. Duhej të bënim çdo gjë që ai të mos agravohej apo acarohej më tepër, sepse qëllimi ishte shpëtimi i jetës së tij dhe pengut.
Koroveshaj rrëfen momentin më kritik të negociatave, kur çdo afrim i gabuar mund të përkeqësonte situatën. Ai tregon se ruajtja e qetësisë dhe komunikimi me autorin ishin vendimtare për lirimin e pengut.
Koroveshaj: Në momentin që jam afruar më ka thënë: “Mos bëj më asnjë lëvizje të afrohesh, se do të vras veten”. Jam tërhequr dhe kam bërë negociatat derisa është bërë e mundur që autori të lironte pengun. Ishte një moment i rrezikshëm. Në ato momente mendon si të shpëtosh një jetë njeriu, çdo sekondë është vendimtare. Veprimet duheshin kryer sa më shpejt, pasi gjendja e rënduar që ndodhej autori mund të agravonte dhe të rëndonte situatën.
Koroveshaj tregon gjendjen e rëndë në të cilën ndodhej vajza pas ngjarjes dhe momentin kur ai ndërhyri për ta larguar nga zona e rrezikut. Ai rrëfen se pas shpëtimit të saj, vijoi negociatat me autorin për ta bindur të dorëzonte armën.
Koroveshaj: Vajza ishte në gjendje shumë të rëndë psikologjike dhe fizike. Kishte dëmtime në pjesën e trupit që ishin shkaktuar nga autori në momentin që e ka marrë me forcë nga banesa. Kishte shumë dëmtime fizike që e bënin të pamundur të ecte. Në ato momente që ka dalë nga automjeti, duhet të largohej sa më shpejt nga zona e rrezikut. Jam rikthyer te autori për të vazhduar negociatat që të lironte armën dhe të mos vazhdonte më me situatën.
