Kryetari i Bashkisë së Tiranës, Erion Veliaj, është paraqitur këtë të premte në Gjykata Administrative, ku po zhvillohet seanca e radhës për padinë e tij ndaj prokurorit Ols Dado.
Gjatë seancës, një grua kërkoi të marrë pjesë si përfaqësuese e Veliajt, por rezultoi se nuk dispononte licencë avokatie. Sipas gjykatës, asnjëra prej palëve nuk e njihte atë dhe çështja do t’u referohet organeve kompetente për verifikime të mëtejshme.
Gjykata bëri me dije se ka marrë një kërkesë për ndërhyrje kryesore në proces nga Tom Deda.
Avokati i Veliajt, Ndreca, deklaroi se ende nuk kanë marrë përgjigje nga Këshilli i Lartë i Prokurorisë (KLP) për kërkesën e paraqitur. Ai tha gjithashtu se i janë drejtuar Kuvendi i Shqipërisë për të konstatuar një konflikt të mundshëm interesi mes Artur Metani dhe Ols Dados, duke argumentuar se Metani ka qenë pjesë e grupit që ka trajtuar emërimin e Dados si prokuror.
Nga ana e tij, Veliaj akuzoi KLP-në se nuk paraqitet në proces dhe nuk jep përgjigje të sakta, ndërsa ngriti edhe pretendime për konflikt interesi në lidhje me veprimtarinë e prokurorit.
Gjykata sqaroi se pretendimet që lidhen me veprimtarinë e Inspektori i Lartë i Drejtësisë (ILD) duhet të trajtohen fillimisht nga ky institucion dhe më pas, nëse është e nevojshme, të kundërshtohen në organet përkatëse dhe në Gjykatën Administrative të Apelit.
Pas kërkesës së mbrojtjes që gjykata t’i drejtohej KLP-së për marrjen e një vendimi, trupi gjykues e rrëzoi këtë kërkesë dhe ndërpreu seancën për 20 minuta, për të shqyrtuar kërkesën e Tom Dedës për ndërhyrje kryesore në gjykim.
