Kuvendi i Shqipërisë zhvillon sot seancën e radhës plenare, ndërsa jashtë godinës është paralajmëruar një protestë nga qytetarët që prej rreth 50 ditësh zhvillojnë tubime të përditshme kundër qeverisë.
Seanca pritet të nisë në orën 12:00 me miratimin e procesverbalit të mbledhjes së 16 korrikut dhe njoftimet përkatëse.
Më pas deputetët do të shqyrtojnë raportin e Këshillit Kombëtar të Integrimit Europian për vitin 2025, projektligjin “Për shoqëritë evropiane të bashkëpunimit (SHEB)”, si dhe një sërë projektrezolutash për vlerësimin e veprimtarisë së institucioneve të drejtësisë dhe organeve të pavarura.
Në rendin e ditës janë përfshirë raportet për Avokatin e Popullit, Këshillin e Lartë Gjyqësor (KLGJ), Këshillin e Lartë të Prokurorisë (KLP), Kontrollin e Lartë të Shtetit (KLSH), Prokurorinë e Përgjithshme, Strukturën e Posaçme kundër Korrupsionit dhe Krimit të Organizuar (SPAK), si edhe Inspektorin e Lartë të Drejtësisë (ILD).
Ndërkohë, organizatorët e protestave u kanë bërë thirrje qytetarëve të mblidhen përpara Kuvendit në të njëjtën kohë me zhvillimin e seancës plenare, duke deklaruar se synojnë të përcjellin mesazhin e tyre drejtpërdrejt përpara deputetëve.
Sipas aktivistëve, protesta para Parlamentit është vazhdim i rezistencës qytetare që prej shtatë javësh zhvillohet çdo mbrëmje në Tiranë. Ata shprehen se nuk ndihen të përfaqësuar nga institucionet dhe kërkojnë ndryshim.
“Do t’i tregojmë Kuvendit se nuk ndihemi të përfaqësuar dhe se qytetarët kërkojnë ndryshim”, u shpreh një nga aktivistët gjatë protestës së mbrëmshme.
Organizatorët kanë bërë të ditur se protestat do të vazhdojnë edhe në ditët në vijim, ndërsa kanë paralajmëruar një mobilizim edhe më të madh më 23 korrik, ditën kur do të zhvillohet seanca e fundit plenare para pushimeve verore të Kuvendit. Sipas tyre, për atë datë po bëhen përgatitje të veçanta me synimin për një pjesëmarrje sa më masive.
