Toni Kroos i jep avantazh Spanjës për finalen e madhe të Kupës së Botës ndaj Argjentinës. Ish-mesfushori gjerman foli me vëllain e tij për duelin e shumëpritur dhe u shpreh se, nëse skuadra e Luis de la Fuente arrin të zhbllokojë ndeshjen, argjentinasit do ta kenë shumë të vështirë të reagojnë.
“Nëse Spanja kalon 1-0 në avantazh, harrojeni, do të vijnë tre apo katër gola. Argjentina nuk do të gjejë zgjidhje”, u shpreh Kroos.
Sipas tij, Argjentina nuk është domosdoshmërisht skuadër më e fortë se kundërshtarët që Spanja ka kaluar gjatë turneut, por ka dy armë shumë të rëndësishme: mentalitetin dhe Lionel Messin.
“Argjentina nuk është më e mirë se Gjermania, por ka një mentalitet të jashtëzakonshëm dhe Messi i ka çuar në finale”, shtoi gjermani.
Kroos vlerësoi gjithashtu evolucionin e Messit, duke theksuar se inteligjenca e tij në fushë vazhdon të rritet edhe në këtë fazë të karrierës.
“E kuptoj që inteligjenca e Messit vazhdon të rritet. Mendova se Botërori i vitit 2022 do të ishte i fundit për të”, tha ai.
Finalja mes Spanjës dhe Argjentinës pritet të jetë një duel mes kontrollit spanjoll dhe karakterit argjentinas, ndërsa Kroos duket i bindur se goli i parë mund të jetë vendimtar për fatin e ndeshjes.
