Eliminimi i Kolumbisë nga Kupa e Botës ka sjellë reagime të forta në vend. Pas humbjes me penallti ndaj Zvicrës në fazën e 1/16-ave, Radamel Falcao nuk i kurseu kritikat për gjendjen e futbollit kolumbian.
Kolumbia u eliminua pas barazimit 0-0 në kohën e rregullt dhe shtesë, ndërsa Zvicra triumfoi 4-3 nga pika e bardhë. Ish-sulmuesi i njohur, golashënuesi më i mirë në historinë e kombëtares kolumbiane, tha se kjo humbje nxori në pah probleme më të thella.
“Është turp, duke parë mundësitë që patëm. Nuk ditëm t’i shfrytëzonim”, u shpreh Falcao.
Ai theksoi se në faza të tilla të një kompeticioni kundërshtarët nuk të falin dhe se Kolumbia është ndëshkuar sërish nga penalltitë, siç ka ndodhur edhe në Botërorin 2018 dhe në Copa America 2019 e 2021.
“Duhet të punojmë me futbollin tonë, klubet tona dhe kombëtaren. Duhet t’i kushtojmë shumë vëmendje kësaj, sepse kemi pasur shumë zhgënjime”, shtoi ai.
Falcao kritikoi ashpër edhe strukturën e futbollit kolumbian, duke përmendur faktin se vendi ka vetëm 36 skuadra profesioniste, 20 në elitë dhe 16 në kategorinë e dytë. Sipas tij, mungesa e një kategorie të tretë është e papranueshme.
“Programet tona për zhvillimin e të rinjve duhet të përmirësohen. Është e papranueshme që nuk kemi një kategori të tretë”, deklaroi ish-sulmuesi.
Ai shkoi edhe më tej, duke thënë se futbolli kolumbian ka mungesë konkurrence dhe se kjo krijon mediokritet, pasi disa klube nuk investojnë mjaftueshëm duke ditur se nuk rrezikojnë rënien nga kategoria.
Pavarësisht kritikave të Falcao, mesfushori Jhon Arias u tregua më optimist pas eliminimit. Ai tha se Kolumbia duhet të mbështetet te forca e saj për t’u ringritur dhe të mos mjaftohet më me arritje të pjesshme.
“Nëse ka diçka që na përkufizon, është rezistenca jonë. Shpresoj që kjo të jetë një nisje e re që një ditë të na çojë deri në finale”, u shpreh Arias.
Kolumbia largohet nga Botërori pa humbje në lojë të hapur, por me një tjetër zhgënjim të madh nga penalltitë.
