Forcat e Komandës Qendrore të Shteteve të Bashkuara (CENTCOM) njoftuan se kanë ndërmarrë një operacion të ri ushtarak kundër Iranit, duke goditur mbi 80 objektiva me armë precize në disa zona strategjike të vendit.
Sipas deklaratës së publikuar nga CENTCOM, sulmet u kryen si përgjigje ndaj sulmeve të fundit që, sipas Uashingtonit, Irani ka ndërmarrë ndaj anijeve tregtare në Ngushticën e Hormuzit, duke e akuzuar Teheranin për shkelje të armëpushimit.
Autoritetet amerikane thanë se objektivat e goditura përfshinin kapacitete kyçe të ushtrisë iraniane, mes tyre sistemet e mbrojtjes ajrore, rrjetet e komandës dhe kontrollit, radarët bregdetarë, pozicionet e lëshimit të raketave kundër anijeve, si dhe më shumë se 60 mjete të vogla detare të Korpusit të Gardës Revolucionare Islamike (IRGC), të vendosura në dhe pranë Ngushticës së Hormuzit.
Sipas Pentagonit, operacioni synonte dobësimin e aftësive ushtarake iraniane për të kërcënuar lundrimin ndërkombëtar në një nga rrugët më të rëndësishme detare për transportin global të naftës.
Deri më tani, autoritetet iraniane nuk kanë reaguar zyrtarisht mbi sulmet e raportuara nga SHBA, ndërsa situata në rajon mbetet e tensionuar, mes shqetësimeve për një përshkallëzim të mëtejshëm të konfliktit.
