Goli vendimtar i Enzo Fernández ndaj Egjiptit nuk i dha vetëm Argjentinës kualifikimin në çerekfinale, por hyri edhe në historinë e Kupës së Botës 2026.
Sipas OptaJoe, goditja me kokë e mesfushorit argjentinas ishte goli i 10-të fitues i shënuar në minutën e 90-të në këtë Botëror. Kjo është shifra më e lartë e regjistruar ndonjëherë në një edicion të vetëm të turneut.
Argjentina fitoi 3-2 ndaj Egjiptit në fazën e 1/16-ave, pas një përmbysjeje spektakolare. Kampionët e botës ishin në disavantazh 0-2 deri në minutën e 79-të, por reaguan në mënyrë të jashtëzakonshme.
Fillimisht Cristian Romero shkurtoi diferencën pas asistit të Lionel Messit. Më pas vetë Messi barazoi rezultatin, duke rikthyer plotësisht besimin te skuadra e Lionel Scalonit.
Në fund, skenën e mori Enzo Fernández. Mesfushori shënoi me kokë golin e fitores dhe dërgoi Argjentinën në çerekfinale, në një tjetër ndeshje dramatike të këtij Botërori.
Ky rekord tregon edhe një herë se Kupa e Botës 2026 po prodhon emocione të mëdha, me shumë sfida që po vendosen në minutat e fundit.
