Brazili ka marrë një lajm të mirë para përballjes ndaj Norvegjisë në fazën e 16 më të mirave të Kupës së Botës.
Trajneri Carlo Ancelotti ka bërë të ditur se Raphinha është shumë pranë rikthimit pas dëmtimit dhe mund të ketë minuta në ndeshjen e ardhshme.
Ylli i Barcelonës e nisi Botërorin si titullar për Brazilin dhe luajti gjatë gjithë ndeshjes ndaj Marokut. Megjithatë, në sfidën kundër Haitit, ai u detyrua të largohej nga fusha në minutën e 40-të për shkak të një dëmtimi muskulor.
Testet mjekësore konfirmuan një problem në tendinën e muskulit të pasmë të kofshës, dëmtim që e la jashtë në dy ndeshjet e fundit ndaj Skocisë dhe Japonisë.
Ancelotti u shpreh optimist për gjendjen e tij, edhe pse theksoi se lojtari nuk është ende në 100%.
“Raphinha ndihet shumë mirë dhe ka bërë progres të dukshëm. Nuk është ende në maksimum, por do të jetë pjesë e skuadrës dhe mund të marrë disa minuta në fushë. Është rikuperuar shumë shpejt dhe jemi të lumtur që e kemi sërish, sepse është një lojtar i rëndësishëm për ne”, deklaroi trajneri i Brazilit.
Përballja mes Brazilit dhe Norvegjisë do të luhet të dielën, më 5 korrik. Fituesi do të kalojë në çerekfinale, ku do të përballet me ekipin që del nga sfida Angli-Meksikë.
