Maroku vazhdon të shkruajë historinë në Kupën e Botës, duke siguruar kualifikimin në çerekfinale pas një fitoreje të madhe ndaj Kanadasë.
Protagonisti absolut i mbrëmjes ishte Azzedine Ounahi, i cili realizoi dy gola të jashtëzakonshëm dhe u kthye në njeriun vendimtar të “Luanëve të Atlasit”. Mesfushori maroken mori skuadrën për dore në një moment të vështirë dhe tregoi edhe një herë klasin e tij në skenën më të madhe të futbollit.
Maroku hyri në këtë sfidë me shumë probleme, pas dëmtimit të Abdes para turneut dhe më pas goditjes së madhe me dëmtimin e Saibarit në fillim të ndeshjes ndaj Kanadasë. Megjithatë, skuadra afrikane tregoi karakter, forcë dhe besim deri në fund.
Kanadaja e nisi mirë ndeshjen dhe arriti të vendoste në vështirësi Marokun, por në portë ishte sërish Bono. Gardiani maroken zhvilloi një tjetër paraqitje fantastike, duke bërë pritje vendimtare dhe duke mbajtur skuadrën në lojë në momentet më të vështira.
Goli i parë i Marokut erdhi pas një skeme të përgatitur mirë. Rreziku i Achraf Hakimit nga një goditje standarde tërhoqi mbrojtjen kanadeze, ndërsa Ounahi u lirua në hyrje të zonës dhe goditi saktë me të parën, duke zhbllokuar ndeshjen.
Më pas erdhi momenti i Brahim Diaz. Ylli maroken, edhe pse jo gjithmonë në maksimumin e tij, ishte vendimtar me dy asiste të tjera, duke shkuar në katër asiste në këtë Botëror.
Në një kundërsulm të shpejtë, Brahim shërbeu në mënyrë perfekte për Ounahin, i cili nuk fali dhe realizoi golin e dytë personal. Më vonë, ai dha edhe një tjetër pasim vendimtar për Rahimin, duke kompletuar një tjetër paraqitje shumë të rëndësishme.
Maroku nuk po fiton gjithmonë me futboll spektakolar, por po tregon se di të vuajë, të mbijetojë dhe të godasë në momentet e duhura. Kjo është shenja e një skuadre të madhe.
Pas gjysmëfinales historike në Botërorin e kaluar, “Luanët e Atlasit” janë sërish mes tetë më të mirëve në botë. Dhe këtë herë, Maroku nuk duket si një surprizë e përkohshme, por si një skuadër që beson vërtet se mund të shkojë deri në fund.
Me Bonon në portë, Brahimin në krijim dhe Ounahin si princin e madh të mesfushës, Maroku ka çdo arsye për të ëndërruar më shumë.
