4 Korriku, i njohur si Dita ePavarësisë, është një nga festat më të rëndësishme kombëtare në Shtetet e Bashkuara të Amerikës.
Në këtë datë, në vitin 1776, delegatët e 13 kolonive amerikane miratuan Deklaratën e Pavarësisë, duke shpallur zyrtarisht shkëputjen nga Britania e Madhe.
Edhe pse Deklarata e Pavarësisë u miratua më 4 korrik 1776, vendimi për t’u shkëputur nga Britania u votua dy ditë më parë, më 2 korrik, nga Kongresi Kontinental.
Për këtë arsye, disa historianë dhe studiues të Kushtetutës argumentojnë se data 2 korrik do të duhej të ishte dita e vërtetë e festimit të pavarësisë.
Lufta për pavarësi kishte nisur në vitin 1775 dhe përfundoi në 1783, kur Traktati i Parisit njohu zyrtarisht pavarësinë e Shteteve të Bashkuara të Amerikës, duke i dhënë fund konfliktit me Britaninë e Madhe.
Që nga viti 1941, 4 Korriku është festë federale në SHBA dhe shënohet çdo vit me parada, koncerte, piknikë familjarë dhe spektakle madhështore me fishekzjarre.
Fishekzjarret, simbol i festimeve
Fishekzjarret janë kthyer në simbolin më të njohur të Ditës së Pavarësisë.
Mijëra qytete dhe komunitete në të gjithë vendin organizojnë shfaqje festive, ndërsa spektaklet më të mëdha zhvillohen në Uashington dhe Nju Jork.
Tradita daton që në vitin 1777, kur Kongresi autorizoi përdorimin e fishekzjarreve për të përkujtuar përvjetorin e parë të pavarësisë.
Sot, çdo shtet amerikan ka rregulla të veçanta për shitjen dhe përdorimin e tyre, me shumë prej tyre që lejojnë qytetarët të përdorin lloje të caktuara fishekzjarresh edhe në ambiente private.
