Ronald Koeman ka dhënë dorëheqjen nga posti i trajnerit të Holandës, pas eliminimit të dhimbshëm nga Kupa e Botës 2026.
“Oranje” u mposht nga Maroku pas penalltive në fazën e 1/16-ave, duke i dhënë fund shumë më herët se pritej aventurës në Botëror. Objektivi i Holandës ishte të arrinte të paktën në gjysmëfinale, por rrugëtimi u ndërpre që në ndeshjen e parë me eliminim direkt.
Pas ndeshjes, Koeman konfirmoi largimin me një mesazh emocional, duke pranuar se fundi i këtij kapitulli ishte shumë i dhimbshëm për të.
“Më dhemb që koha ime me kombëtaren holandeze përfundoi në këtë mënyrë. Të gjithë ëndërronim për një Botëror ku do të shkruanim histori. Nuk ishte e mundur. Askush nuk është më i zhgënjyer se unë. Si trajner i kombëtares, e ke këtë përgjegjësi. E kam ndjerë gjithmonë dhe do ta ndiej gjithmonë”, shkroi ai.
Trajneri holandez falënderoi lojtarët, stafin, federatën dhe tifozët për mbështetjen gjatë viteve në krye të kombëtares.
“Dua të falënderoj të gjithë lojtarët me të cilët kam pasur privilegjin të punoj. Përkushtimi, karakteri dhe besimi i tyre më kanë motivuar çdo ditë. Falënderoj gjithashtu stafin tim, KNVB-në dhe të gjithë njerëzit që punojnë pas skenave. Mbi të gjitha, faleminderit tifozëve. Ishte një nder i madh të përfaqësoja Holandën si trajner i kombëtares”, u shpreh Koeman.
Në letrën e tij, ai preku edhe një arsye shumë personale, duke folur për gjendjen shëndetësore të bashkëshortes së tij, Bartina.
“Futbolli ka qenë jeta ime, por shëndeti është i paçmuar. Kur dikush që e do me gjithë zemër po lufton një betejë të vështirë, perspektiva ndryshon. Bashkëshortja ime, Bartina, pavarësisht sëmundjes së saj, më ka mbështetur çdo ditë për ta përfunduar punën time si trajner i kombëtares. Kjo tregon një forcë të jashtëzakonshme”, tha ai.
Koeman kishte marrë për herë të parë drejtimin e Holandës në vitin 2018, duke e çuar ekipin deri në finalen e Nations League në vitin 2019. Më pas u largua për të drejtuar Barcelonën, ndërsa u rikthye te Holanda pas Kupës së Botës 2022, si pasardhës i Louis van Gaal.
Ai arriti gjysmëfinalet e Euro 2024, por Botërori 2026 përfundoi me zhgënjim të madh. Tani Holanda duhet të nisë një kapitull të ri, ndërsa Koeman largohet me një mesazh të ndjerë dhe me shumë emocione.
