Faza e grupeve në Kupën e Botës 2026 është mbyllur pas 72 ndeshjeve dhe tashmë vëmendja kalon te faza me eliminim direkt. Para nisjes së 1/16-ave, janë përzgjedhur lojtarët që kanë spikatur më shumë në turne deri tani.
Sipas Opta Analyst, formacioni më i mirë i fazës së grupeve përfshin disa prej yjeve më të mëdhenj të Botërorit, por edhe emra surprizë që kanë lënë gjurmë me paraqitjet e tyre.
Në portë është Vozinha i Cape Verde, një nga protagonistët kryesorë të kualifikimit historik të kombëtares afrikane. Në moshën 40-vjeçare, ai ka qenë vendimtar në ndeshjet ndaj Spanjës, Uruguait dhe Arabisë Saudite, duke ndihmuar Cape Verde të kalojë më tej pa pësuar në dy nga tre sfidat e grupit.
Në mbrojtje janë zgjedhur Marvin Senaya i Ganës, Diney Borges i Cape Verde, Pau Cubarsí i Spanjës dhe Keito Nakamura i Japonisë. Senaya shkëlqeu sidomos ndaj Anglisë, ku neutralizoi Anthony Gordon, ndërsa Diney Borges ishte një nga shtyllat e prapavijës së Cape Verde, me shumë duele të fituara dhe ndërhyrje vendimtare.
Pau Cubarsí, vetëm 19 vjeç, ka treguar pjekuri të madhe në mbrojtjen e Spanjës, jo vetëm në duele, por edhe në ndërtimin e lojës me top. Nga krahu tjetër, Nakamura ka qenë një nga lojtarët më të rrezikshëm të Japonisë, me shpejtësi, driblime dhe ndikim të madh në fazën sulmuese.
Në mesfushë janë Weston McKennie i Shteteve të Bashkuara dhe Pedro Vite i Ekuadorit. McKennie ka qenë shumë i rëndësishëm për SHBA-në me energjinë, futjet në zonë dhe rastet e krijuara, ndërsa Vite ka spikatur si një lojtar i plotë, duke kombinuar kreativitetin me punën pa top.
Sulmi është pjesa më spektakolare e këtij formacioni. Lionel Messi është zgjedhur në krahun e djathtë pas një faze grupesh fantastike, ku ka shënuar gjashtë gola dhe ka vazhduar të thyejë rekorde në Kupën e Botës. Edhe në moshën 39-vjeçare, kapiteni i Argjentinës ka treguar se mbetet një nga lojtarët më vendimtarë të turneut.
Në krahun e majtë është Vinícius Júnior, i cili ka dhënë përgjigjen më të mirë për kritikat ndaj paraqitjeve të tij me Brazilin. Ai shënoi në të tre ndeshjet e grupit dhe u bashkua me emra të mëdhenj të historisë braziliane që kanë realizuar në çdo ndeshje të fazës së grupeve.
Në qendër të sulmit janë Erling Haaland dhe Kylian Mbappé. Norvegjezi ka shënuar katër gola në vetëm dy paraqitje, ndërsa Mbappé ka qenë një nga lojtarët më të mirë të një France që e mbylli grupin me pikë të plota. Francezi ka qenë i përfshirë direkt në gjashtë gola, po aq sa Messi.
Formacioni më i mirë i fazës së grupeve:
Vozinha; Marvin Senaya, Diney Borges, Pau Cubarsí, Keito Nakamura; Weston McKennie, Pedro Vite; Lionel Messi, Vinícius Júnior; Erling Haaland, Kylian Mbappé.
