Anglia siguroi kualifikimin në fazën e 1/16-ave të Kupës së Botës si kryesuese e Grupit L, por paraqitjet e skuadrës së Thomas Tuchel nuk kanë bindur plotësisht. Pas fitores 2-0 ndaj Panamasë, Gary Neville kërkoi më shumë nga “Tre Luanët”, duke veçuar Jude Bellingham si lojtarin e vetëm që po luan në nivelin e pritur.
Bellingham dhe Harry Kane shënuan golat e fitores ndaj Panamasë, një rezultat që i dha Anglisë vendin e parë në grup dhe një përballje në fazën tjetër ndaj RD Kongos në Atlanta.
Megjithatë, Neville nuk u impresionua nga loja e skuadrës. Sipas tij, Bellingham është i vetmi futbollist që aktualisht duket në formë, i freskët dhe vendimtar në fushë.
“Ai është lojtari i vetëm që duket në formë. Është i freskët, i mprehtë dhe po luan në nivelin që pritet prej tij”, u shpreh Neville për ITV.
Ish-kapiteni i Manchester United theksoi se Anglia duhet të përmirësohet shpejt në fazën me eliminim direkt, sidomos në aspektin mbrojtës. Ai nënvizoi mungesën e Declan Rice në ndeshjen e fundit dhe paralajmëroi se kundërshtarë më të fortë nuk do t’i falin hapësirat që Panama arriti të krijonte.
“Duhet të ngrihen në nivel në ndeshjet e mëdha. Duhet të kthehet Declan Rice, mbrojtja duhet të jetë më solide dhe skuadra duhet të përmirësohet”, shtoi ai.
Neville pranoi se Anglia e arriti objektivin duke fituar grupin, por tha se pritshmëritë janë rritur shumë pas turneve të fundit, ku skuadra ka shkuar deri në gjysmëfinale dhe finale.
“Ndoshta është hera që jemi më të zhgënjyer edhe pse kemi mbyllur grupin në vendin e parë. Arsyeja është se këta lojtarë kanë vendosur një standard të lartë dhe tani presim më shumë prej tyre”, tha Neville.
Ndërkohë, Ian Wright doli në mbrojtje të Bellingham, i cili shpesh kritikohet për vetëbesimin e tij në fushë. Legjenda e Arsenalit tha se ajo që disa e quajnë arrogancë, në fakt është pjesë e karakterit që e bën mesfushorin një lojtar special.
Sipas Wright, Bellingham është një futbollist që kërkon të marrë përgjegjësi, të udhëheqë skuadrën dhe të bëjë diferencën në momentet më të rëndësishme.
