Luis de la Fuente ka folur para ndeshjes së Spanjës ndaj Arabisë Saudite, një sfidë që pas barazimit zhgënjyes me Cabo Verde ka marrë peshë të madhe për “La Roja”.
Trajneri spanjoll pranoi se skuadra duhet të reagojë, por theksoi se nuk ka vend për dramë. Sipas tij, kritikat pas ndeshjes së parë kanë pasur efekt pozitiv te lojtarët.
“Lojtarët janë shumë të karikuar. Kritikat, edhe kur janë të drejta, ndonjëherë të motivojnë edhe më shumë. Jam i sigurt se nesër do të shohim një Spanjë krejt tjetër”, u shpreh De la Fuente.
Tekniku pranoi se ndaj Arabisë Saudite mund të ketë ndryshime në formacion, por sqaroi se ato nuk lidhen domosdoshmërisht me paraqitje të dobëta individuale, por me nevojën për t’iu përshtatur kundërshtarit.
Një nga temat kryesore ishte edhe Lamine Yamal. De la Fuente konfirmoi se talenti i Barcelonës është rikthyer në gjendje të mirë dhe ka shumë dëshirë për të lënë gjurmë në këtë Botëror.
“Lamine është mirë, dhe ky është lajmi më i mirë. Gjëja më e rëndësishme është që e kemi sërish me ne. Është shumë i motivuar për të bërë diçka të rëndësishme në këtë turne”, tha trajneri.
Pas barazimit 0-0 me Cabo Verde, Spanja duhet të fitojë ndaj Arabisë Saudite për të mbajtur në dorë fatin e saj në grup, përpara sfidës së fundit ndaj Uruguait.
