Seanca e sotme plenare është shoqëruar me debate mes ish-kryeministrit Sali Berisha dhe kreut të grupit parlamentar të PS-së, Taulant Balla, lidhur me protestat e qytetarëve të cilat sot hyjnë në ditën e 19-të.
Berisha tha se protestat e ditëve të fundit janë shprehje e revoltës qytetare kundër, siç u shpreh ai, një “diktature autoritare”. Ish-kryeministri tha se do ta mbrojë kauzën e protestës dhe i kërkoi demokratëve që të bashkohen me qytetarët.
Nga ana tjetër, Balla sfidoi Berishën që të marrë pjesë vetë në protestat e opozitës. Kreu i Grupit të PS-së deklaroi se opozita nuk mund të pretendojë të përfaqësojë protestuesit.
Në debat është përfshirë edhe deputeti Flamur Noka, i cili ka replikuar me akuza të forta ndaj Ballës, duke e tensionuar më tej situatën në Kuvend.
Berisha: Të nderuara deputete e deputetë, të dashur qytetarë që ndiqni këtë seancë e cila përbën një akt cinik, një akt të vërtetë lufte ndaj atyre qindra mijëra qytetarëve që kanë pushtuar rrugët dhe sheshet e Tiranës në mbrojtje të rendit kushtetues, në mbrojtje të ligjeve shqiptare dhe ndërkombëtare të dhunuara në mënyrë flagrante nga Edi Rama dhe klanet e tij me pushtet dhe në bodrumet e karteleve të drogës. Janë 18 ditë të papara në historinë e Shqipërisë. Kurrë ndonjëherë shqiptarët nuk janë derdhur në rrugët dhe sheshet e kryeqytetit të tyre në emër të asaj përgjegjësie, që është përgjegjësia më e lartë pas përgjegjësisë para Zotit, përgjegjësisë qytetare.
Qytetarët dhe rinia shqiptare kanë mbushur sheshet dhe rrugët e Shqipërisë, absolutisht jo kurrë si një lëvizje fashiste apo antisemite apo antitrampiste, jo dhe jo. Ata kanë mbushur rrugët dhe sheshet kundër një diktature autoritare që shkelmon, që zvarrit, që shkelmon të drejtat e njeriut dhe që zvarrit qytetarët paqësorë. Kundër një diktature autoritare që ka ndërtuar në Shqipëri narkoshtetin e vetëm në Evropë.
Balla: I fundit që mund të flasë në emër të protestuesve është ky pelikani këtu (Berisha). Sali Berisha unë të sfidoj. Sot pasdite shko në protestë. Shkon dot në protestë? Provoje po ta mbajti. Personalisht kam plotësuar një prej kërkesave të protestueve, ata thonë “Sali Berisha në burg”, unë e kam bërë një kallëzim për ty. I ftoj protestuesit ta marrin në shqyrtim
Noka drejtuar Ballës: Ti do shkosh në burg, në të sëmës do shkosh
Balla: Ditën e dytë të protestës the që je kundër protestës, sot thua jam përfaqësues i protestës. I fundit je ti që mund të na bësh ne ndërmjetësin me protestuesit.
