Megaoperiacioni i zhvilluar ditën e premte, falë bashkëpunimit të SPAK dhe Policisë së Shtetit, nga i cili u goditën grupe kriminale emrat e të cilëve janë goxha të njohur, e ka pësuar dhe biznesmeni Edmond Jaupaj.
Për Edmond Jaupajn, i cili është vëllai i drejtoreshës së Agjencisë Kombëtare të Ujësjellës-Kanalizimeve (AKUK), Elidiana Çelaj, me kërkesë të SPAK, është caktuar masa e sigurisë “Arrest shtëpie“.
“Mbi bazën e kërkesës së Prokurorisë së Posaçme, Gjykata e Posaçme për Korrupsionin dhe Krimin e Organizuar me vendimin nr. 31, datë 10.6.2026 ka caktuar masën e sigurimit personal shtrëngues “Arrest në burg”, parashikuar nga neni 238 i Kodit të Procedurës Penale për 15 shtetas shqiptarë: si edhe masën e sigurimit “Arrest në shtëpi” për 5 shtetas të tjerë: G.I, L.B, E.J, B.M, E.R”thuhet në njoftimin e bërë nga SPAK.
Kujtojmë se Çelaj, kohë më parë ka pasur pozicionin e drejtoreshës së bizneseve VIP pranë Drejtorisë së Tatimeve.
Sakaq, Edmond Jaupaj ushtron aktivitet si CEO i kompanisë Daikin/ESC, e cila operon në fushën e sistemeve të kondicionimit.
Po ashtu, ai njihet dhe si nipi i Rebani Jaupaj, kryepolici që drejtoi Policinë e Tiranës gjatë periudhës Maj 2019 deri në Tetor 2021 dhe njeriu që hartoi në vitin 2020 planin për goditjen e lojërave të fatit.
Në kuadër të megaoperacionit nga i cili u goditën dhjetëra biznesmenë të njohur të fushës së ndërtimit, SPAK ka lëshuar gjithsej 20 masa sigurie, konkretisht 15 masa “arrest me burg” dhe 5 masa “arrest në shtëpi”, në mesin të cilave renditet dhe emri i CEO-s së kompanisë “Daikin”.
