Lamine Yamal ka zbuluar arsyen pse shfaqet shpesh në ndeshje me dorën e fashuar. Në një video të publikuar në kanalin e tij në YouTube, ylli i Barcelonës tregoi me humor se gjithçka nisi nga një incident teksa luante PlayStation.
“Po luaja PlayStation, godita televizorin dhe dëmtova gishtat. U enjtën shumë, ndaj i fashova. Fasha dukej shumë mirë, si ajo e Karim Benzema. Bëmë shakanë KB9 dhe e mbajta”, tha Lamine.
Talenti i Barcelonës foli edhe për llogarinë e supozuar në Twitter, duke sqaruar se nuk është ai pas profilit “RyanBus19”. Ai theksoi se nuk ka Twitter, edhe pse herë pas here hyn për të lexuar çfarë shkruhet.
Yamal u ndal edhe te Topi i Artë, ku sezonin e kaluar përfundoi i dyti pas Ousmane Dembélé. Ai pranoi se atë ditë kishte menduar se mund ta fitonte, por tani e sheh ndryshe situatën.
“Mendoj se ishte mirë për mua që fitoi Dembélé. Ndoshta nuk ishte momenti i duhur për mua, sepse isha ende shumë i ri për ta kuptuar plotësisht çfarë do të thotë të fitosh Topin e Artë”, u shpreh ai.
Në fund, Lamine bëri edhe një premtim me shaka për Kupën e Botës. Nëse Spanja fiton trofeun, ai tha se do të lërë mjekër dhe mustaqe për tre javë.
