Milani po përgatitet për një rindërtim të madh dhe një nga figurat më të rëndësishme në këtë proces pritet të jetë Zlatan Ibrahimovic.
Edhe pse nuk është drejtues zyrtar i klubit kuqezi, Ibra është partner dhe aksioner te RedBird, ndërsa gëzon besimin e plotë të Gerry Cardinale. Për këtë arsye, fjala e tij pritet të ketë peshë të madhe në vendimet kryesore që do të merren për të ardhmen e Milanit.
Cardinale e përfshiu Ibrahimovic në projekt pas tërheqjes së tij nga futbolli, duke i ofruar një rol të veçantë brenda strukturës së RedBird. Zlatan nuk është pjesë e menaxhimit të përditshëm të klubit, por si këshilltar i rëndësishëm, ai ka ndikim sidomos në vendimet teknike.
Roli i tij pritet të jetë vendimtar në zgjedhjen e trajnerit të ri, stafit teknik dhe strategjisë sportive për sezonin e ardhshëm. Ibrahimovic ka diskutuar tashmë me Cardinale për këto çështje, në një moment kur Milani kërkon të nisë një kapitull të ri pas një sezoni të dështuar.
Klubi kuqezi synon të ndërtojë një strukturë të re drejtuese, me një CEO, një drejtor teknik dhe një drejtor sportiv. Kjo do t’i jepte Ibrahimovic mundësinë të mos merret me menaxhimin e përditshëm, por të fokusohet më shumë te vendimet strategjike.
Në listën e emrave për drejtimin teknik është edhe Txiki Beguiristain, ish-drejtues i Barcelonës dhe Manchester City, i cili vlerësohet shumë nga Ibrahimovic. Ai shihet si një profil ideal për të ndërtuar një projekt të madh edhe në Itali.
Përveç tij, përmenden edhe Ramon Planes, aktualisht te Al Ittihad, Viktor Bezhani i Toulouse dhe disa alternativa italiane, mes tyre edhe Fabio Paratici, i cili ishte pëlqyer nga Milani edhe një vit më parë.
Tashmë e ardhmja e Milanit do të varet nga zgjedhjet që do të bëhen në javët e ardhshme. Dhe në këtë proces, Zlatan Ibrahimovic pritet të jetë një nga zërat më të rëndësishëm pranë Cardinale.
