Egnatia ka arritur një tjetër fitore të rëndësishme në fazën “Final 4”, duke mposhtur Vllazninë me rezultatin 2-1 në stadiumin “Air Albania”.
Skuadra rrogozhinase e nisi mirë takimin dhe mbylli pjesën e parë në avantazh. Goli erdhi nga Eljon Sota, i cili shfrytëzoi një krosim të Kryeziut dhe me kokë dërgoi topin në rrjetë.
Në pjesën e dytë, Egnatia pati mundësi për të dyfishuar, por Vllaznia arriti të reagojë në minutën e 77-të. Pas një topi të kthyer nga shtylla, Qato barazoi rezultatin dhe riktheu emocionet në sfidë.
Megjithatë, në fund ishte Egnatia që festoi. Në minutën e 88-të, Adjesa shënoi golin vendimtar, duke i dhënë skuadrës së tij fitoren 2-1 dhe tre pikë me shumë vlerë.
Me këtë sukses, Egnatia ngjitet në krye të renditjes me 34 pikë. Elbasani dhe Vllaznia ndjekin me nga 31 pikë, ndërsa Dinamo City ka 27 pikë, me një ndeshje më pak.
Sfida tjetër e “Final 4” do të luhet nesër në “Air Albania”, ku Elbasani do të përballet me Dinamo City në orën 19:00.
