Al-Nassr është shpallur kampion i Saudi Pro League pas fitores bindëse 4-1 ndaj Damac në javën e fundit të kampionatit.
Skuadra saudite arriti ta mbyllë garën për titull në mënyrën më të mirë, me Cristiano Ronaldo që ishte protagonist në momentet vendimtare të ndeshjes.
Al-Nassr kaloi në avantazh në minutën e 34-t me Sadio Mané, ndërsa në fillimin e pjesës së dytë Kingsley Coman dyfishoi rezultatin. Damac u rikthye përkohësisht në lojë me një gol nga pika e bardhë, por më pas skena ishte e gjitha për Ronaldo.
Portugezi shënoi një gol spektakolar nga goditja e dënimit dhe më pas realizoi edhe golin e katërt në minutën e 81-të, duke kompletuar dopietën e tij dhe duke vulosur fitoren 4-1.
Ky është titulli i parë kampion për Ronaldo në Arabinë Saudite, ndërsa 41-vjeçari e mbylli sezonin me një tjetër moment historik në karrierën e tij.
Me këtë dopietë, Ronaldo arrin në kuotën e 973 golave në karrierën profesioniste dhe udhëheq Al-Nassr drejt trofeut të shumëpritur.
