Neymar do të jetë pjesë e Brazilit në Botëror, por roli i tij nuk do të jetë më i njëjtë si më parë. Carlo Ancelotti e ka përfshirë yllin brazilian në listën për turneun e verës, duke i dhënë një mundësi të fundit me fanellën e Seleção.
Sipas raportimeve nga Brazili, para se vendimi të bëhej zyrtar, Ancelotti dhe drejtori sportiv Rodrigo Caetano zhvilluan një video-telefonatë me Neymar. Gjatë bisedës, ata i shpjeguan qartë rolin që do të ketë në skuadër dhe rregullat që duhet të ndjekë.
Neymar nuk do të jetë më kapiten dhe as titullar i garantuar. Për më tepër, atij i është kërkuar të ulë praninë në rrjetet sociale, si pjesë e ndryshimeve disiplinore dhe të atmosferës brenda kombëtares.
Qëndrimi pozitiv i lojtarit ka bindur përfundimisht Ancelotti, i cili e vlerëson Neymar si një lojtar të rëndësishëm, por pa vendosur gjithë peshën e Brazilit vetëm mbi të.
“Neymar ka të njëjtin rol dhe të njëjtat detyrime si 25 lojtarët e tjerë. Mund të luajë, mund të mos luajë, mund të hyjë nga stoli ose të qëndrojë në stol. Do të luajë nëse e meriton”, u shpreh Ancelotti.
Braziliani nuk ka luajtur me kombëtaren prej tre vitesh për shkak të dëmtimeve dhe problemeve të tjera, por tani do të ketë mundësinë të rikthehet në skenën më të madhe të futbollit.
