Josko Gvardiol është një nga emrat që i është ofruar Real Madrid për merkaton e verës. Mbrojtësi kroat ka kontratë me Manchester City deri më 30 qershor 2028, por përfaqësuesit e tij po shqyrtojnë destinacione të mundshme dhe madrilenët janë një nga klubet që pëlqehen nga lojtari.
Te Real Madrid lëvizja ka tërhequr vëmendje, pasi prioriteti i klubit është përforcimi i mbrojtjes, sidomos në qendër. Emri i Gvardiol nuk është i ri për drejtuesit madrilenë, pasi ai ka qenë në radarët e klubit që nga koha kur shkëlqente te Dinamo Zagreb dhe më pas te RB Leipzig.
Në vitin 2023, Manchester City pagoi rreth 90 milionë euro për ta transferuar, duke fituar garën ndaj klubeve të tjera. Tani, edhe pse për momentin nuk ka negociata konkrete për një transferim, agjentët e lojtarit po testojnë terrenin për të ardhmen.
Gvardiol ka kaluar një sezon të vështirë për shkak të një dëmtimi në këmbë, që e ka mbajtur jashtë fushës. Ai iu nënshtrua operacionit në janar dhe ende nuk është rikthyer në garë, ndërsa mbetet në dyshim edhe për Botërorin.
Përveç Gvardiol, Real Madrid i është ofruar edhe Bernardo Silva. Portugezi po kërkon një klub të ri dhe më herët ka refuzuar ofertën e Barcelona. Ardhja e mundshme e José Mourinho në stolin e Real Madrid mund të ndikojë edhe në strategjinë e merkatos së klubit.
Situata te Manchester City mbetet e lidhur edhe me të ardhmen e Pep Guardiola, e cila ende nuk është plotësisht e qartë. Kjo ka bërë që disa lojtarë të skuadrës angleze të presin zhvillimet përpara se të vendosin për hapat e tyre të ardhshëm.
