Rikthimi i José Mourinho te Real Madrid duket gjithnjë e më pranë. Bisedimet mes trajnerit portugez dhe klubit po ecin pozitivisht, ndërsa në Madrid e shohin atë si figurën që mund të rikthejë autoritetin dhe kontrollin në dhomën e zhveshjes.
Në një moment kur skuadra po kalon një krizë sportive dhe institucionale, emri i Mourinho shihet si një zgjidhje e fortë për të vendosur disiplinë dhe për të rikthyer konkurrencën në nivelin e kërkuar.
Gazetari portugez Nuno Luz, i afërt me rrethin e Mourinho, ka folur për mundësinë e rikthimit të tij në Madrid dhe ka theksuar se trajneri do ta pranonte këtë sfidë vetëm nëse do të kishte autoritet të plotë në projekt.
Sipas tij, Mourinho kërkon lojtarë të gatshëm për punë dhe sakrificë, ndërsa qëndrime si ato të fundit të Kylian Mbappé do të ishin të papranueshme për portugezin.
“Mourinho ka nevojë të ketë fuqinë për të vendosur cilët lojtarë do të shkojnë në luftë me të. Ai kërkon shumë punë dhe një sjellje e tillë nga Mbappé është e papranueshme për të”, u shpreh Nuno Luz.
Gazetari shtoi se Mourinho sot është më i qetë se në periudhën e parë te Real Madrid, më mbështetës ndaj lojtarëve dhe më pak konfliktual në konferenca. Megjithatë, sipas tij, portugezi mbetet i njëjti në thelb: kur ka diçka për të thënë, e thotë hapur.
Në Madrid besohet se skuadra ka nevojë për një lider të fortë, i aftë të vendosë rregull dhe të rikthejë respektin brenda grupit. Për këtë arsye, klubi po mbështetet te karakteri, eksperienca dhe lidershipi i Mourinho për të ndryshuar drejtimin e projektit.
