Makina e gazetarit dhe botuesit nga Bulqiza, Sami Curri, është përfshirë nga flakët në orët e para të së dielës, në një incident që autoritetet po e hetojnë si zjarrvënie të qëllimshme.
Sipas policisë së Dibrës, ngjarja ndodhi rreth orës 02:58 të 26 prillit, kur një automjet tip “Ford Fiesta” u përfshi nga flakët ndërsa ishte i parkuar pranë banesës së gazetarit.
Autoritetet thanë se një grup hetimor, nën drejtimin e prokurorisë, po punon për të identifikuar autorët dhe për të dokumentuar rrethanat e rastit.
“Grupi hetimor, nën drejtimin e Prokurorisë, po vijon intensivisht veprimet për zbardhjen dhe dokumentimin ligjor të rastit, identifikimin dhe vënien para përgjegjësisë ligjore të autorëve, pasi paraprakisht dyshohet për djegie të qëllimshme,” deklaroi policia.
Curri tha se ishte njoftuar nga fqinjët për zjarrin pak minuta më herët dhe se makina ndodhej rreth 30 metra larg pallatit ku ai banon. Ai shtoi se flakët nuk shkaktuan dëme në automjetet e tjera të parkuara pranë.
Në një reagim për ngjarjen, gazetari e lidhi incidentin me aktivitetin e tij profesional dhe raportimet për çështje lokale në Dibër.
“Së pari kjo gjë është e qëllimshme dhe është totalisht me synimin për të sjellë një mesazh tek unë për punën që bëj. u them atyre që e kanë bërë këtë veprim se as nuk do të më kërcënojnë dot dhe as nuk do të më frikësojnë, sepse për mua gazetaria është një mision që i shërben interesit publik dhe kjo gjë do të vazhdojë me çdo çmim. një nga çmimet, mesa duket, ishte edhe kjo,” tha Curri.
Ai shtoi se prej javësh ka qenë në kontakt me persona që preken nga temat që trajton në punën e tij.
“Unë kam 10 vjet që punoj si gazetar. puna ime është e fokusuar në qarkun e dibrës, kryesisht në mbulimin e çështjeve që lidhen me prokurimet publike, me pushtetin vendor dhe me çështjet e drejtësisë,” u shpreh ai.
Sipas tij, zjarrvënia ndaj automjetit ishte një mesazh paralajmërues.
“Kjo ishte për të më dhënë mesazhin që kjo ishte e para dhe që raste të tilla mund të vazhdojnë edhe më tej. a më intimidon kjo? absolutisht që jo. nuk më ndal dot,” tha Curri.
Gazetari theksoi gjithashtu se kërcënimet janë një realitet i përditshëm për profesionin.
“Kërcënimet në punën e gazetarit janë të përditshme. duhet t’i marrim parasysh, sepse puna jonë prek interesat e njerëzve që kanë pushtet dhe që abuzojnë me fondet publike, dhe patjetër që kërcënohesh,” tha ai.
Curri tregoi se ishte njoftuar për zjarrin rreth orës 03:00 të mëngjesit nga një fqinj.
“Makina ishte e parkuar poshtë pallatit ku jetoj me nënën time. fatmirësisht nuk pati dëme te makinat e tjera të parkuara pranë,” shtoi ai.
Ai shprehu shpresën që organet e drejtësisë të zbardhin ngjarjen, ndonëse mbetet skeptik.
“Shpresoj që organet e drejtësisë të bëjnë punën e tyre për zbardhjen e ngjarjes, por nuk besoj se ngjarja do të zbardhet. është një ndjesi e brendshme që e kam krijuar nga puna ime e përditshme. megjithatë shpresoj shumë që të ketë hetime cilësore, që edhe kolegët e tjerë të ndihen të motivuar në punën e tyre,” tha ai.
Gazetari shtoi se për momentin nuk ka një person konkret që mund ta dyshojë për ngjarjen.
“Nuk mund të them që kam dikë të dyshuar, pasi ngjarja sapo ka ndodhur dhe nuk dua të bëj gabime për shkak të tensionit. shpresoj që hetimet të jenë cilësore, në mënyrë që komuniteti i gazetarëve të mos ndihet i cenuar apo i kërcënuar në punën e tyre,” përfundoi Curri.
Me rreth një dekadë përvojë në gazetari, Curri drejton median lokale “Bulqiza ime” dhe ka bashkëpunuar edhe me BIRN, duke u fokusuar në monitorimin e pushtetit vendor, mjedisit dhe çështjeve që prekin komunitetin.
