Pas humbjes së Real Madridit ndaj Bayern Munich në çerekfinalen e Champions League, atmosfera në dhomat e zhveshjes ka qenë shumë e tensionuar.
Sipas raportimit të MatchDay Central, presidenti i klubit madrilen, Florentino Perez, ka hyrë në dhomat e zhveshjes menjëherë pas ndeshjes dhe ka shfaqur hapur zemërimin e tij për situatën e skuadrës.
Ai u ka drejtuar lojtarëve një mesazh shumë të fortë, duke e bërë të qartë pakënaqësinë për ecurinë e sezonit.
“Një sezon pa trofe te Real Madridi është dështim. Dy të tillë janë të papranueshëm.”
“E vlerësoj përpjekjen e sotme, por ky sezon ka qenë një zhgënjim i vërtetë.”
“Të luash për Real Madridin është privilegj me përgjegjësi të madhe. Shumë prej jush nuk kanë qenë në lartësinë e saj.”
“Të paktën, mbylleni kampionatin me dinjitet”, mësohet të ketë thënë ai.
Real Madridi tashmë është eliminuar nga Champions League dhe i ka mbetur vetëm gara për La Liga. Momentalisht, madrilenët ndodhen nëntë pikë pas Barcelonës, kur kanë mbetur edhe shtatë ndeshje deri në fund të sezonit.
Pas ndeshjes u bë e ditur gjithashtu se trajneri i Real Madridit ka sqaruar se kush, sipas tij, mbajti përgjegjësi për momentin kur sfida doli jashtë kontrollit.
Eduardo Camavinga, i aktivizuar në pjesën e dytë, mori kartonin e parë të verdhë në minutën e 78-të dhe vetëm tetë minuta më vonë u ndëshkua edhe me të dytin. Mësohet se kartoni i dytë u konsiderua i nxituar dhe i panevojshëm.
