Ish-mesfushori gjerman Toni Kroos ka dhënë vlerësimin e tij për përballjen mes Real Madrid dhe Bayern në Champions League, gjatë podcast-it “Einfach mal luppen”, që e drejton së bashku me vëllanë e tij, Felix.
Kroos analizoi ndeshjen e parë të çerekfinales, e cila përfundoi me fitoren 2-1 të skuadrës gjermane, ndërsa vëmendja tashmë është përqendruar te takimi i kthimit në “Allianz Arena”.
Duke folur për atë që ndodhi në sfidën e parë, Kroos u shpreh se nuk u befasua nga zhvillimi i ndeshjes, edhe pse pranoi se Bayern zhvilloi një paraqitje shumë të mirë.
“ Nuk u habita nga ajo që ndodhi në ndeshje, edhe pse Bayern bëri një paraqitje të shkëlqyer. Ajo që më ra më shumë në sy ishte ajo që ndodhi pasi kaluan në avantazh 2-0, sidomos nga ana mendore. Në vitet e fundit, Bayern ka bërë ndeshje të mira ndaj Real Madrid, por në takimin e kthimit shpesh nuk arrin ta ruajë të njëjtin nivel ose të sigurojë kualifikimin, duke u ndikuar nga detaje të vogla”, tha Kroos.
Sipas tij, epërsia 2-0 duhej të kishte mjaftuar që Bayern ta mbyllte ndeshjen edhe në aspektin psikologjik.
“ Le ta shpjegoj. Avantazhi 2-0 duhej të kishte qenë i mjaftueshëm për ta mbyllur ndeshjen mendërisht dhe për të larguar çdo dyshim mbi rezultatin. Por ajo që më habiti ishte se Bayern nisi të tërhiqej dhe të mbronte me më pak intensitet”, deklaroi ai.
Kroos theksoi se në atë moment Bayern kishte kontroll të plotë të lojës dhe ai priste që skuadra gjermane të vazhdonte të dominonte.
“ Në atë moment, Bayern e kishte totalisht nën kontroll ndeshjen dhe prisja që të vazhdonte dominimin, madje edhe ta thellonte avantazhin. Mendova se do ta ruanin kontrollin përmes mbajtjes së topit ose do të shënonin golin e tretë, të katërt, ndoshta edhe të pestin. Por ndodhi e kundërta”, u shpreh ish-mesfushori gjerman.
Ai veçoi edhe gabimin e Upamecano ndaj Vinicius si një moment kyç të takimit, duke theksuar se pas atij episodi Real Madrid tregoi menjëherë karakterin e tij.
“ Gabimi i Upamecano ndaj Vinicius ishte një pikë kthese në ndeshje. Pas atij momenti, Real Madrid tregoi karakter dhe krijoi disa raste të rrezikshme mes minutës së 60-të dhe 75-të, edhe pse ishte në disavantazh 0-2”, tha Kroos.
Në analizën e tij, Kroos nënvizoi se forca më e madhe e Real Madrid shfaqet pikërisht kur ndeshja bëhet e hapur dhe ka sulme të njëpasnjëshme nga të dyja skuadrat.
“ Sipas mendimit tim, Real Madrid është skuadra më e rrezikshme në botë kur ndeshjet bëhen kaotike, me aksione nga njëra portë te tjetra. Është një stil loje që ata e pëlqejnë shumë. Pikërisht për këtë arsye Real Madrid iu afrua barazimit. Ndeshja mund të kishte përfunduar 3-3, por u mbyll 1-2. Nga këndvështrimi im, Bayern duhej ta menaxhonte më mirë ndeshjen, ose duke ruajtur epërsinë prej dy golash, ose duke shfrytëzuar hapësirat për të shënuar edhe golin e tretë apo të katërt”, përfundoi ai.
