Miqësorja mes Brazilit dhe Kroacisë solli jo vetëm emra të mëdhenj në fushë, por edhe momente nostalgjie për tifozët e Real Madridit. Një nga episodet që mori më shumë vëmendje pas ndeshjes ishte takimi mes Carlo Ancelottit dhe Luka Modricit, i cili u bë menjëherë viral në rrjetet sociale.
Pas fitores 3-1 të Brazilit, trajneri italian u afrua te kapiteni kroat me humor dhe i tha: “Mos ke ndonjë gjysh brazilian?”. Ishte një batutë e Ancelottit për të vlerësuar formën e shkëlqyer të Modricit edhe në moshën 40-vjeçare, por edhe si një lloj “pengu” që nuk e ka më në skuadër. Mesfushori kroat e priti me buzëqeshje komentin e ish-trajnerit të tij, përpara se të dy të përqafoheshin në një skenë shumë të ngrohtë.
Modric ishte sërish protagonist me Kroacinë, duke udhëhequr mesfushën si titullar dhe duke treguar edhe një herë rëndësinë e tij për kombëtaren. Edhe pse loja e tij ra disi me kalimin e minutave, ai la gjurmë në fushë përpara se të zëvendësohej pas një ore lojë. Botërori 2026 pritet të jetë turneu i fundit i madh ndërkombëtar në karrierën e legjendës kroate.
Takimi mes Ancelottit dhe Modricit nuk ishte i vetmi moment emocionues për tifozët madrilenë. Kamerat kapën edhe përshëndetje të përzemërta mes ish-shokëve të skuadrës, me emra si Vinicius dhe Endrick që u panë pranë kroatit pas ndeshjes. Një mbrëmje miqësore që solli jo vetëm futboll, por edhe shumë kujtime nga një prej epokave më të lavdishme të Real Madridit.
