Víctor Muñoz, Endrick dhe Nico Paz do të bëjnë fazën përgatitore me Real Madridin në verë, ku do të përpiqen të bindin klubin për të fituar një vend në skuadër për sezonin e ardhshëm.
Real Madridi ka një klauzolë riblerjeje prej 8 milionë eurosh në fund të sezonit për Víctor Muñoz. Osasuna e transferoi verën e kaluar për 5 milionë euro me kontratë pesëvjeçare dhe me klauzolë largimi 40 milionë euro, ndërsa klubi madrilen ka ruajtur 50% të të drejtave ekonomike të lojtarit.
Sezoni i shkëlqyer i sulmuesit anësor katalanas nuk ka kaluar pa u vënë re. Në 31 ndeshje me Osasunën në La Liga dhe Kupën e Mbretit, ai ka realizuar 6 gola dhe 4 asiste në sezonin e tij të parë në elitë. Forma e tij e mirë bëri që trajneri i Spanjës, Luis de la Fuente, ta grumbullonte për ndeshjet miqësore ndaj Serbisë dhe Egjiptit, ku Muñoz debutoi duke shënuar gol në La Cerámica.
Pas këtij debutimi mbresëlënës, 22-vjeçari konsiderohet si një kandidat i fortë për të qenë pjesë e listës së Spanjës për Kupën e Botës, sidomos duke parë se Nico Williams vazhdon rikuperimin nga një dëmtim në ijë. Muñoz shihet si lojtari që i afrohet më shumë profilit të tij për shkak të karakteristikave të ngjashme.
Sipas burimeve të Cadena SER, Víctor Muñoz do të rikthehet te Real Madridi në fund të sezonit, ashtu si edhe Nico Paz dhe Endrick. Të tre do të vlerësohen gjatë fazës përgatitore dhe më pas do të merret një vendim për të ardhmen e tyre. Edhe pse mund të mos ketë vend për të gjithë në ekip, klubi dëshiron t’u japë mundësinë të tregojnë se e meritojnë fanellën e Real Madridit.
Në zyrat e klubit madrilen tashmë po punohet për sezonin e ri dhe emri i Víctor Muñoz është një nga më të diskutuarit. Forma e tij ka tërhequr vëmendjen edhe të klubeve të tjera europiane, por Real Madridi ka përparësi për ta rikthyer dhe nuk dëshiron ta humbasë këtë mundësi.
