Prokuroria e Përgjithshme e Stambollit ka lëshuar një urdhër arresti për aktoren e njohur turke Hande Erçel mbi një çështjeje që lidhet me drogën. Lajmi është raportuar nga Cumhuriyet më 25 mars.
Sipas raportimeve, në momentin e marrjes së vendimit për arrestim, aktorja ndodhej në Londër. Ajo është kthyer në Turqi dje së bashku me partnerin e saj të ri Onur Güvenatam për të dhënë shpjegime lidhur me situatën. Në reagimin e saj të parë në Instagram, ajo ka deklaruar se ndodhej jashtë vendit për arsye studimi.
“Për shkak të studimeve kam qenë jashtë vendit prej rreth një muaji. Mbrëmjen e djeshme, ashtu si edhe ju, e mora vesh këtë situatë përmes mediave. Për të sqaruar gjithçka, do të kthehem dhe do të jap shpjegimet e nevojshme. Jam një person që e dua vendin tim dhe kam besim te shteti dhe sistemi i drejtësisë në Turqi. Besoj se situata do të sqarohet së shpejti,” është shprehur ajo.
Në kuadër të hetimit që po zhvillohet në Stamboll, një vendim i ngjashëm është marrë edhe për 16 persona të tjerë, nga të cilët 14 janë ndaluar tashmë. Ky vendim përfshin edhe emra të njohur nga bota e biznesit dhe publike, si Hakan Sabancı dhe vëllai i tij Kerim Sabancı, ish-presidenti i Galatasaray Burak Elmas, ish-presidenti i Beşiktaş Fikret Orman, si dhe ish-modelja Güzide Duran dhe modelja Didem Soydan.
Gjithashtu bëhet e ditur se lidhja trevjeçare mes Hande Erçel dhe Hakan Sabancı ka përfunduar në gusht të vitit 2025.
