Një lajm i rëndë ka ardhur për Liverpoolin dhe për kombëtaren e Francës. Sulmuesi francez Hugo Ekitike ka pësuar një dëmtim serioz në ndeshjen e Premier League ndaj Brighton, duke ngritur frikë të madhe për një mungesë të gjatë.
Gjithçka ndodhi vetëm shtatë minuta pas nisjes së takimit, kur sulmuesi u rrëzua në fushë në dhimbje të mëdha dhe e pati të pamundur të vazhdonte lojën. Pamjet nga stadiumi ishin shqetësuese, pasi lojtari u largua nga fusha në lot, i shoqëruar nga stafi mjekësor.
Gjendja e tij në momentin kur po shkonte drejt tunelit ka shtuar edhe më shumë frikën, me raportimet që tregojnë se bëhet fjalë për një dëmtim të rëndë. Nëse konfirmohet shkalla e dëmtimit, Ekitike mund të qëndrojë gjatë jashtë fushave.
Kjo do të ishte një goditje e madhe jo vetëm për Liverpoolin, por edhe për Francën, pasi sulmuesi tashmë rrezikon seriozisht të humbasë edhe Botërorin 2026.
Tani pritet që ekzaminimet mjekësore të japin një pasqyrë më të qartë për gjendjen e lojtarit dhe kohën e rikuperimit, por shqetësimi është i madh si te klubi anglez, ashtu edhe te kombëtarja franceze.
