UEFA ka hapur procedurë disiplinore ndaj sulmuesit të Chelsea, Pedro Neto, pas incidentit në ndeshjen e Champions League kundër Paris Saint-Germain.
Futbollisti portugez 26-vjeçar shtyu një mbledhës topash në minutat shtesë të sfidës së parë të 1/8-ave në “Parc des Princes”, takim që Chelsea e humbi 5-2 ndaj PSG-së. Si pasojë e shtyrjes, i riu ra nga karrigia, ndërsa episodi shkaktoi edhe tension mes lojtarëve të të dy skuadrave.
UEFA bëri të ditur se ndaj Netos është nisur procedurë për “sjellje josportive”, në përputhje me rregulloren disiplinore të institucionit. Organet disiplinore të UEFA-s pritet të marrin një vendim në ditët në vijim.
Pas ndeshjes, Neto kërkoi falje për incidentin dhe tha se gjithçka ndodhi nga emocionet e lojës, teksa po përpiqej të merrte topin sa më shpejt.
“Nuk jam kështu. Ishte një reagim në vapën e momentit dhe dua të kërkoj falje. Ia dhashë fanellën time. Më vjen shumë keq dhe ndiej se duhet t’i kërkoj ndjesë”, deklaroi Neto për TNT Sports.
Ai shtoi se, për shkak se nuk flet mirë frëngjisht, bashkëlojtar i tij te Portugalia, Vitinha, i shpjegoi mbledhësit të topave se ai nuk është i tillë. Sipas Netos, në fund situata u qetësua, i riu qeshi dhe pranoi fanellën, ndërsa lojtari i Chelsea tha se i kërkoi falje “rreth 35 herë”.
Chelsea do të presë PSG-në të martën e ardhshme në ndeshjen e kthimit, pasi më parë do të përballet me Newcastle në Stamford Bridge në Premier League.
